NAKADUSO na og Statement of Contribution and Expenditures (Soce) ang tanang politiko nga ningdaug sa nilabay nga eleksiyon niadtong Mayo 13.
Samtang pito ka mga pildero ang wala pa niduso niini hangtud sa gitagal nga adlaw niadtong Hunyo 13.
Sa pakighinabi sa SunStar Superbalita Cagayan de Oro kang Atty. Ramil Acol, city election officer sa Commission on Elections (Comelec), gibutyag niini nga siyento porsyento na nga nakaduso og Soce ang mga nidaug.
“Duna lang pito wala ka file, murag 61 man siguro to ang naka-file. ang mga winners nakafile tanan,” matud ni Acol.
Samtang giingong ang nasudnong buhatan na ang mopakanaog na og posibleng atubangon sa pito ka mga nagpapili sa nilabay nga eleksiyon.
“Ang campaign finance na sa Manila ang mopakanaug sa unsa man ang ila atubangon. It is beyond my authority,” dugang ni Acol.
Nasayran nga niadtong Hunyo 13 lamang ang pinakaulahing adlaw nga pweding magduso og Soce ug ang mapakyas sa pagpasa niini mag-atubang sa posibleng mga administratibo nga mga silot.