SUPERBALITA CAGAYAN DE ORO

Capitol Park sirad-an og 2 ka bulan

DUHA ngadto sa tulo ka mga bulan nga ihunong ang operasyon sa Capitol Park, samtang padayon ang clearing operation ug pagpanglimpyo sa palibot sa Kapitolyo.

Kini nagpasabot nga wala unay gitugotan nga mag-jogging, zumba ug mamaligya sa maong dapit.

Dili tiaw ang gakadawat nga reklamo sa mga personahe sa Capitol Clean and Green niadtong nagpuyo pa nga milangtod og usa ka tuig ang lumad nga mga bakwit sa dapit human naipit sa giyera tali New People's Army ug kasundalohan didto sa Sitio Mikamansi, Banglay lungsod sa Lagonglong, Misamis Oriental.

Sagad sa mga reklamo maong ang hugaw sa tao nga naa sa palibot ug dili na kini matawag nga recreational area.

Mismo ang SunStar Superbalita Cagayan de Oro nakasaksi sa duha ka mga bata nga bisan asa na lang nagpagawas sa ilang hugaw.

"Sa tinoud lang, dili baya unta kadto sila mapapahawa kay si Governor Bambi malouy kaayo sa ilahang kahimtang, gani nasabotan bag-o nga gamay lang nga repair ang ilang himoun, pero naa may balaod nga dili sila pwede magtukod diri og estraktura," matud ni Guibone sa interbyu sa SunStar Superbalita Cagayan de Oro.

Bisan ang mga netizens nga Kagay-anon ug Misamismon ubay-ubay ang komento ug reaksyon sa Superbalita Facebook Page ug nipaabot sa ilang kalipay nga balik sa normal ang kahimtang sa Capitol Park.

"Katungod pod namo nga mosimhot og limpyo nga hangin sa Capitol Park kay diha gyod mi gatambay sa among pamilya sa una pero usa katuig nga wala na namo na gisuroyan nga lugar kay grabe ka baho kaayo, napasagdan na gyod pagmaayo," matud sa usa ka Cheeze Reyes.

"Suruyanan ang Capitol Park, dili evacuation center. Sobra na kaayo ang usa ka tuig nga pagpuyo ug paghugaw nila sa suroyanan sa katawhan, daghan ang nagsakripisyo," tipik sa komento ni Lilibeth Mejo.

"Sa Provincial Capitol Team, you did a good job. Salamat sa inyong pagpangusog nga mapahawa sila. Wala moy sayop kay plastar inyong paghangyo nga makabalik sila sa ilang lugar. Ila nang problema kung dili sila manguli," dugang sa usa ka Jane Bacalares.

Si Lorna Guibone, kinsa head sa Capitol Park Clean and Green, niingon nga sirad-an usa ang Kapitolyo samtang padayon ang ilang paglimpyo niini.

Gibutyag sab niini nga adunay kasilyas nga ilang gihatag sa mga bakwit apan dili didto gagamit.

Atol sa ilang operasyon nga paglimpyo, aduna silay mga nadiskubre nga mga hugaw nga gilubong lamang sa tapad sa punoan sa kahoy. Nitabang sa paglimpyo ang Bureau of Fire Protection ug gibuhosan og tubig ang Capitol Park.

Gidili usa ang mag-jogging ug mag zumba karong panahona samtang gilimpyo kini ug maayo ug mawala ang baho.

Nakadeploy sab ang kapolisan sa Misamis Oriental Provincial Police Office nga mobantay sa palibot sa kapitolyo human gidid-an ang mga bakwit nga mobalik sa dapit.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph