USA sa mga anak sa gipatay ni kanhi mayor Ricardo Ramirez sa lungsod adunay gidudahan nga tawo nga likod sa pagpatay sa iyang amahan sulod sa tambalanam.
Huwebes sa buntag niadto sa Medellin Police Station ang kamanghurang anak ni Ramirez nga si Pedro Jesus, alyas PJ, aron pagbutyag nga andam kini makig-alayon alang sa dugang nga pakisusi sa kapulisan.
Wa kini nidetalye pa, apan nitug-an kini nga aduna siyay gidudahan nga tawo nga maoy likod sa pagpatay sa iyang amahan.
Gitug-an ni Police Major Audie Pelayo nga sa pag-abot sa kamaguwangan nga anak sa kanhi mayor, dungan sila ni PJ nga moduol sa police station.
“Ang family nianhi na sa amua kaganiha, si PJ, ako siya giingnan kon kanus-a siya makalugar nga ma-interview ka namu, niingon siya sa pagkakaron sir, busy pa gyud mi, basin kuno ugma, dili pud siya, iya kunong brother. Naa siyay giingon man, pero wala pud siya nisulti tanan, naa kuno siyay suspect, pero wala siya mosulti kon kinsa nga suspect,” asoy ni Pelayo sa Superbalita Cebu.
Samtang upat sa mga saksi ang naestorya sa kapulisan kagahapon, apan wa silay bag-ong nakuha.
Wa sila makakuhag plate numbers sa upat ka mga sakyanan tungod sa kapaspas sa hitabo ug sa ngitngit kini naka-park.
Samtang negatibo sa ilegal nga drugas si Jail Officer1 Renan Pableo, kinsa maoy nagbantay ni Ramirez atol sa insidente. (FMD)