KAMANGHURANG' anak sa gipatay nga pulis sa lungsod sa Cordova ang nitug-an nga walay mahuna-hunaan ang pamilya nga suspetsado sa kamatayon sa amahan.
Wala'y nadawat nga hulga sa kinabuhi ang pamilya ug wala usab nakasulti si Police Chief Master Sergeant Deogenes Carrillo nga aduna kini death threats.
Natinga ug nagpangutana pa ang pamilya kon si kinsa ang posibleng masuko sa haligi sa ilang pamilya nga mabuhat ang maong klase sa pagpatay.
Gihulagway sa anak nga si Dennis Kevin, 24 anyos, nga dedicated sa trabaho ang amahan, gani bisan magkasakit kini, dili kini mopalta sa pagtrabaho. Wala usab kini na-estorya nga problema sa pagpamulis niini.
Gani ikapila ka higayon na sila sa pamilya, matud pa nihangyo sa amahan nga mag-early retirement, apan mas gipili niini nga tiwason ang pagpanerbisyo. Si Carrillo ang aduna nalang duha unta ka tuig sa pagpanerbisyo una mo-retiro.
Kon kalabot sa negusyo nga pautang, matud sa anak nga ginagmay ug mga kasagaran manindahay sa merkado o mga prutasan ug gulayan sa lungsod sa Cordova ang kasagaran nga customer sa amahan, diin halos kada adlaw sa pagpadung niini pauli gikan sa police station mohapit siya sa pagpaningil.
Dili usab bisan gamay makatuo ang nag-inusarang anak lalaki ni Carrillo sa gialegar nga nalambigit ang amahan sa ilegal nga drugas.
"Bisan gamay, dili ko makatuo ma-involve siya (Carrillo). Ma-involve siguro kay nanakop siya sa mga drug lord. But ang siya gyud mangunay sa drugs, dili gyud. Ako gani sige niya i-remind nga dili gyud moapil-apil o mokuyog mga barkada nga involve sa drugas, kay mangunay gyud siyag posas nako," saysay sa anak sa Superbalita Cebu.
Human gi-autopsy ang patay'ng lawas ni Carrillo sa punerarya sa Mandaue, gidala kini Byernes sa kaadlawon, Hunyo 21, sa ilang panimay sa Punta Engaño, alang sa haya.
Si Carrillo ang deputy chief sa Cordova Police station. Gikan siya og duty sa dihang gipusil kini sa motorcycle-riding gunmen diha sa Barangay Poblacion, lungsod sa Cordova, Huwebes sa buntag, Hunyo 20. (FMD)