USA ka bagyo ang gilantawan nga mosulod sa Philippine area of responsibility (PAR) karong weekend nga posibleng makadala og mga pag-ulan sa Kabisay-an sugod Dominggo, Hunyo 23, 2019, hangtud sa Martes.
Usa ka low pressure area ang gi-monitor karon sa Philippine Atmospheric, Geophysical and Astronomical Services Administration (Pagasa) nga anaa sa 1,300 kilometros ang gilay-on gikan sa eastern Mindanao, gawas pa sa PAR.
Gilantawan nga mosulod kini sa nasud Sabado sa gabii, Hunyo 22, o sa Dominggo, Hunyo 23.
Matud ni Romeo Aguirre, weather specialist sa Pagasa Mactan, dako ang kahigayunan niini nga mahimo nga bagyo.
Atol sa pagsulod niini sa PAR nga kon mahimo kini nga bagyo, mao na unya kini ang ikaupat nga bagyo nga nakasulod sa nasud ning tuiga.
Ang bagyo pagatawgon og Bagyong Dodong.
Posible kini nga magdala og mga pag-ulan sa Kabisay-an sugod sa Dominggo hangtud sa Martes sunod semana.
Sa pagkakaron, wala pa nakita sa Pagasa nga mohimo og pag-landfall ang maong bagyo sa bisan asa nga parte sa Pilipinas, kon dili mobaybay lang kini sa kadagatan sa silangan nga bahin sa nasud.
Aduna gihapon nga masinati nga mga pag-ulan sa pipila ka bahin sa Central Visayas sama sa Sugbo atol sa gabii o kaadlawon tungod sa localized thunderstorm sa Biyernes ug Sabado.
Apan bisan paman sa gilantawan nga pagsulod sa bagyo, anaa gihapon ang init nga panahon, sama nalang sa gilantawan nga 27 to 33 degrees Celsius nga temperatura sa Sabado, diin aduna kini gibana-bana nga heat index nga moabot sa 41 degrees Celsius. (SunStar Cebu)