LUWAS nga imnon ang tubig nga mogawas sa gripo sa 12 ka mga tunghaan sa Dakbayan sa Sugbo nga nagnegatibo sa fecal coliform human kini gipaubos sa water sampling sa Metropolitan Cebu Water District (MCWD).
Ang MCWD nipaubos sa 15 ka mga tunghaan sa Sugbo og water sampling aron masiguro nga luwas nga mainom ang tubig sa gripo niini.
Tampo kini sa MCWD sa niaging Brigada Eskwela niadtong buwan sa Mayo.
Matud sa tigpamaba sa MCWD nga si Charmaine Rodriguez-Kara nga gisugdan nila ang pagpanguha sa water samples niadtong Mayo 28.
Biyernes, Hunyo 21 dihang nadawat nila ang resulta sa 12 pa ka mga tunghaan ug posible nga sa sunod semana na mahibaw-an ang nahabiling tulo ka mga tunghaan.
Dugang ni Kara nga gipili nila ang mga tunghaan nga aduna'y daghang mga tinun-an ug mga konsumidor usab nila.
Hinuon gipahibawo ni Kara nga mamahimo nilang ma-accomodate ang mga tunghaan nga gustong magpa-sampling sa ilahang water supply lakip na kadtong aduna'y atabay.
Lakip sa mga tunghaan nga nag-negatibo sa fecal coliform mao ang Banilad Elementary School, Barrio Luz National High School, Lahug Elementary School, Tejero Elementary School, Abellana National High School, Cebu City Central School, Labangon Elementary School, Basak Community School, Pardo Elementary School, Guadalupe Elementary School, ug Punta Princesa Elementary School.
Samtang gihuwat pa ang resulta sa Tisa II Elementary School, Don Vicente Rama Memorial Elementary School ug sa Talamban Elementary ug National High School.
“This is an annual outreach program of MCWD as part of its contribution to the Brigada Eskwela Program,” matud ni MCWD General Manager Jose Eugenio Singson Jr. (Superbalita Cebu)