GUMIKAN sa dakong kalampusan sa labing unang pagpahigayon sa Mega Wear Half Marathon, ang mga nag-organisar niini nakahukom nga mopasiugda og ikaduhang edisyon sa lumba karong Hulyo 7 sa SM City Cebu.
Ang lumba alang gihapon sa benepisyo sa Cancer Warriors Foundation.
“We were able to give P50,000 to the foundation last year, and we’re glad to help them on our own little way. They used the funds to buy medicines,” matod ni Mega Wear owner Excel Canque sa usa ka press conference kagahapon.
Ning tuiga, ang lumba langkuban og 21-kilometer, 12K, 6K ug 3K categories nga mahimong salmutan sa tanang mga mahiligon sa pagdagan.
“Hopefully we can generate the same funds for the foundation this year,” dugang ni Canque.
Ang Mega Wear, nga usa ka sewing ug printing company nga tighimo og fun run equipments sama sa singlet, nagpahigayon ning maong lumba isip bugti sa suportang ilang nadawat gikan sa running community sa Sugbo.
“This is also our way of giving back to the runners. We always want to give them a quality run just like we did last year,” matod ni Canque.
Matod ni race director Joel Baring nga ang lumba limitado lang sa 1,000 ka mga partisipante aron maseguro ang kalidad niini.
Ang rehistrasyon sa 3K ug 6K hangtod lang karong Hunyo 30 samtang sa 21K ug 12K hangtod nga maabot sa limit.
Ang rehistrasyon nagkbalor og P900 sa 21K, P700 sa 12K, P500 sa 6K ug P350 sa 3K. (RSC)