GIHAKOP og kalibog si Senate President Tito Sotto kay ang bag-ong midaog nga mga senador midemanda og komitiba. Sen. Imee Marcos gustong mohupot sa Ways and Means diin moagi ang tanang balaodnon ingon man sa Local Government nga gigunitan karon ni Sen. Sonny Angara. Ang Committee on Local Government gihuptan kaniadto ni Sen. Bongbong Marcos nga maoy mipanday sa SK Reform Act kauban nila ni Sen. JV Ejercito, Bam Aquino ug Nancy Binay. Si Angara gustong mopuli sa Committee on Finance nga biyaan ni Sen. Loren Legarda nga napiling kongresista sa Antique.
Si Sen. Lito Lapid gusto sa Games and Amusement nga gihuptan ni Sen. Ping Lacson. Si Lacson gustong mobalhin sa Public Order and Dangerous Drugs.
Si Sen. Bato dela Rosa gustong mohupot sa National Defense nga iya ni Sen. Gringo Honasan kinsa gihugon-hugon nga itudlo og kalihim sa Department of Communications and Transportations.
Sila si Sen. Pia Cayetano, Win Gachalian ug Joel Villanueva nag-ilog sa Committee on Education nga talikdan ni Sen. Chiz Escudero nga napiling gobernador sa Sorsogon.
Si Sen. Bong Revilla desidido sa Public Services nga gigunitan ni Sen. Grace Poe ug Public Works nga iya ni Sen. Manny Paquiao. Tumong ni Poe nga mahimong chairman sa Senate Blue Ribbon Committee nga gigunitan ni Sen. Richard Gordon. Si Gordon mao say naghupot sa Committee on Justice nga gustong huptan ni Sen. Francis Tolentino.
Si Sen. Bong Go segurado na nga maoy pahupton sa Committee on Health gumikan sa kaepiktibo sa Malasakit Centers.
Mao nalay nahabilin sa minority bloc sila si Sen. Franklin Drilon, Riza Hontiveros, Kiko Pangilinan ug wala nay labot si Sen. Leila de Lima nga tua na sa prisohan nga namatud-ang protektor sa drugas.
Si Sen. Poe nangagpas nga kon lahugayon ang komitiba sa senado unya moinsister si Sotto posibling matangtang isip senate president. Hungihong pa hinoon nga ipuli si Sen. Cynthia Villar. Wala ba kahay mangambak sa minority bloc.
Sa ubos Balay-Balaoranan hulipan pagka house speaker si Rep. Gloria Arroyo sa Pampanga. Kandidato sila si Rep. Martin Romualdez sa Leyte ubos sa Lakas Christian Democrats, Pantaleon Alvarez sa Davao del Norte ubos sa PDP Laban, Lord Allan Velasco sa Marinduque sa PDP Laban, Peter Allan Cayetano sa Taguig ubos sa NP ug Loren Legarda sa Antique ubos sa NPC.
Ang Senate president ug House speaker gikatakdang pilion sa Hulyo 22, 2019 nga mao sab ang pagdeliber ni Duterte sa State of tha Nations Address (Sona). Sila unya ang dakog papel alang sa katumanan sa legislative agenda ni Duterte. (csa_1156@yahoo.com/09064648954)