SAN Juan, Siquijor -- Nagkinahanglan og dugang 9,180 megawatt (MW) nga supply sa kuryente ang tibuok Central Visayas tungod sa nagkataas nga panginahanglan sa rehiyon hangtod sa tuig 2040.
Ang Department of Energy (DOE) mipadali na sa duha nga mga proyekto alang sa dugang supply sa kuryente sa rehiyon pinaagi sa pag-certify niini sa nasudnong kagamhanan nga labing mahinungdanong proyekto sa enerhiya.
Atol sa full council meeting sa Regional Development Council (RDC) Central Visayas niadtong Biyernes, Hunyo 21, 2019 sa Siquijor, si DOE Visayas acting director J. Rey Maleza niingon nga sukad niadtong Disyembre 31, 2018, dunay mga proyekto nga gipanglantawan nga mohatag og dugang 765.9 MW nga supply sa kuryente.
Pipila usab ka mga proyekto sa pag-gama og dugang supply sa kuryente nga kasamtangan pa nga gi-proseso nga gipanglantawan nga maka-supply og dugang 3,903.4 MW nga supply sa kuryente.
Nagpasabot kini nga ang Kabisay-an nagkinahanglan nalang og 4,510.7 MW nga kinatibuk-ang dugang supply sa kuryente hangtod sa tuig 2040 tungod sa pag-uswag sa ekonomiya sa rehiyon.
“We conducted an investment forum last month, trying to lure investors to supply this 4,510.7 MW for the construction of power plants in the Visayas. But the problem coming up with the possible investments is on the permits and licenses in putting up baseload power plants. There are now four provinces that declared that they don’t want coal-fired power plant,” matod ni Maleza.
Sa pagkakaron, 47 porsiyento sa gross power generation gikan sa coal-fired power plants.
Si Maleza nagkanayon nga sukad Marso 2019 ang Kabisay-an nakasinati og red ug yellow alert sa supply sa kuryente tungod sa ubos nga produksyon sa power sources ug pagpaubos niini sa preventive maintenance service.
Niadtong Huwebes, Hunyo 20, ang DOE nipasaka sa alert level sa supply sa kuryente sa Kabisay-an ngadto sa red alert sugod sa 7:00 sa gabii human nisaka ang demand ngadto sa 2,082 MW apan ang system capacity moabot lang ngadto sa 2,014 MW.
Ang red alert status nagpasabot nga walay back-up supply sa kuryente nga mo-resulta sa rotational black out.
Sugod sa 2:00 sa hapon sa samang adlaw, ang Kabisay-an gipaubos sa yellow alert status nga nagpasabot nga critical level ang supply sa kuryente apan wala pay blackout.