SIQUIJOR--Mo-bid ang siyudad sa Sugbo sa United Nations Educational, Scientific and Cultural Organization (Unesco) aron madeklarar nga Creative City for Design.
Atol sa ikaduhang quarter meeting niadtong Biyernes, Hunyo 21, 2019 sa lalawigan sa Siquijor, ang Regional Development Council sa Central Visayas niduso sa gitinguha sa bag-ong giumol niini nga subcommittee on arts, culture and design nga madeklarar ang siyudad sa Sugbo nga Creative City for Design sa Unesco.
Si Kenneth Cobonpue, co chair sa RDC 7, nibutyag nga apil sa mga benepisyo nga makuha kon maangkon ang maong titulo mao ang pagbinayloay og mga programa sa mga desinyo tali sa Creative Cities nga naunang nadeklarar sa Unesco alang sa investments o pagdani og dugang mga magpapatigayon.
“Meaning ang atoang mga policies sa LGU nato will be focused towards design,” sumala ni Cobonpue.
Apil sa mga rekisitos aron makuha ang titulo nga kinahanglan ang siyudad dunay usa ka lugar diin ipahimutang ang mga industriya alang sa desinyo, mga programa sama sa Cebu Design Week ug mga polisiya nga mapasayon ang transaksyon ug koordinasyon.
Ang bid sa Cebu City kay usa ka public-private partnership, dugang ni Cobonpue.
Sa website sa Unesco, tumong sa Unesco Creative Cities Network (UCCN) nga naumol niadtong 2004, ang pag-promote sa kooperasyon uban ug tali sa mga siyudad nga nag-ila sa creativity isip strategic factor alang sa sustainable urban development.
Ang UCCN gilangkoban sa 180 ka mga siyudad gikan 72 ka mga nasod. Nakatutok kini sa pito ka fields of activity: crafts and folk art, media arts, design, film, gastronomy, literature, ug music. Ang UCCN kay nagtinabangay alang sa katuyoan, ang pagbutang sa creativity ug cultural industries sa sentro sa ilang development plans sa local level ug aktibo nga makigtambayayong sa international level. (SCG)