Pagtukod og special courts gihangyo

SIQUIJOR--Nihangyo ang Regional Development Council (RDC) sa Central Visayas sa Korte Suprema nga maghimo og special courts nga maoy motutok og hawid sa mga kaso kalabot sa pagpalit og yuta sa gobiyerno nga gamiton sa lainlaing mga proyekto sa imprastruktura.

Ang RDC 7 nihangyo usab sa nagkadaiyang executive judges sa Regional Trial Court (RTC) sa Central Visayas nga hatagan og prayoridad ang dinalian nga pag-isyu og writ of possession alang sa infrastructure projects sa rehiyon.

Atol sa ikaduhang quarter meeting sa RDC sa probinsya sa Siquijor niadtong Biyernes, Hunyo 21, 2019, ang RDC nipalabang sa mga hangyo pinaagi sa duha ka mga resolusyon.

Matod ni Glenn Soco, chairman sa Infrastructure Development Committe sa RDC 7, gikinahanglan ang mga espesyal nga korte nga modungog sa expropriation cases tungod kay daghan na og mga proyekto sa paghimo og mga dalan ang nalangay og pagpatuman gumikan sa isyu sa right-of-way (ROW).

Usa sa iyang gihimong ehemplo ang nahitabo nga road widening sa 6.7 kilometros nga Tayud-Liloan bypass road nga gisugdan niadto pang 2010.

“Hangtod karon it’s still left unfinished. Some portions of the project have been terminated already,” dason ni Soco.

Ubos sa Section 6 sa Republic Act 10752 kun Right of Way Act, pito ka adlaw human ang Department of Public Works and Highways o bisan unsa nga implementing agency mobayad sa kantidad sa yuta, ang RTC moisyu og writ of possession aron masugdan ang proyekto.

Gipahimug-atan ni Soco nga dili lang sa Sugbo ang problema sa ROW kondili sa ubang mga dapit usab sa Central Visayas.

Sa iyang bahin, si DPWH 7 Regional Director Edgar Tabacon namahayag nga dugay na nila gikinahanglan ang mga espesyal nga korte nga mokupot og expropriation cases tungod kay kasagaran sa ilang mga proyekto kay mag-abli ug magpalapad og karsada.

Matod niya nga kasagaran mosangpot sila sa expropriation case kay may ubang mga tag-iya og luna ang dili mouyon sa ilang gitanyag nga presyo.

Matod niya, ang ubang mga tag-iya nga dili mosugot sa ilang gitanyag nga appraise value kay dili usab mosugot sa ilang laing option, ang zonal value.

“Most of the time the zonal value is lower than the appraise value. So, di pa gyud sila mosugot,” matod ni Tabacon.

Siya nitug-an nga dunay mga proyekto nila nga naabtan og usa ka tuig ang pagdungog sa expropriation cases.

“Imagine, in just one project sometimes we have 300 claimants. How many projects do we have puro ingon ana? Most of the complainants is for expropriation,” pahayag ni Tabacon.

Gikan sa 2018 hangtod sa 2019, kapin sa 100 ka mga proyekto o 70 porsyento sa ilang mga proyekto kay naay expropriation cases.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph