GIHATAG na sa Kagamhanan sa Dakbayan sa Lapu-Lapu ngadto sa kapulisan ang P1 ka milyon nga reward sa pagsulbad sa kaso sa dalagang si Christine Lee Silawan.
Gitunol ni outgoing Lapu-Lapu City Mayor Paz Radaza ang tseke ngadto kang Police Colonel Limuel Obon, director sa Lapu-Lapu City Police Office (LCPO), sa iyang buhatan atubangan sa mga tigbalita sa Biyernes, Hunyo 21.
Aron di na mahasol pa pagpa encash sa kwarta, gipangalan ang tseke ngadto ni Obon, inay sa LCPO.
Kini gumikan kay si Obon ang nakahibawo kinsa ang mabahinan sa salapi, matod sa mayor.
Sa ingon, dali ra usab kini maapod-apod ngadto sa bahinan nga mga impormante sa kapulisan.
Lakip sa makabahin ang kapuyo ni Renato Llenes, suspek sa pagpatay, ug ang iyang duha ka kanhi kapuyo.
Giklaro ni Radaza nga angay nga adto ihatag sa kapulisan ang kwarta sanglit sila ang naghago pag-imbestigar sa kaso hangtod nga nataral sa hukmanan si Llenes.
Sila usab ang nakahibawo kinsa ning ilang bahinanan sa salapi.
“Anyway, naa namay report siyang gihatag (si Obon) ug unsay breakdown. So, ipa-receive na nila. Ana ra man ang sistema,” matod ni Radaza sa pangutana kon magkinahanglan pa ba og liquidation ang kagamhanan sa nahisgotang salapi.
Gihangop ni Obon ang paghatag sa ganti sa kagamhanan sa Dakbayan sa Lapu-Lapu, apan nitataw nga wa sila mag-apas niini.
Gihulagway niya nga bonus lang ang pagtuman sa kagamhanan sa ilang gisaad.
Apan dili usab nila mahimong masulbad ang kaso kon wa usab ang tabang sa mga impormante.
“Although dili tanan nag-wish nga naay mahitabong in-ani, but og naa gani, it will motivate other people to come in the open not because of the reward, not just of the reward, but ang ilahang patriotic duty nga motabang aron masulbad ang usa ka krimen,” matod ni Obon sa pangutana unsa kamahinungdanon ang paghatag og mga ganti alang sa kasulbaran sa usa ka krimen.