NAGKITA mi ni Elvis Somosot ang nailang composer, arranger, musical director og daghan pa nga titulo nga nasab-ong sa iyang pangalan. Busy si Elvis karon pag-compose ug arrange sa mga kanta nga gipahaom sa kagustohan sa mga pulitiko.

Nahibalo ba mo nga ang labing sikat nga tuno nga nagustohan sa mga pulitiko? Naggikan sa sikat sab nga kanta sa Wonder Girls nga giulohan og ‘Nobody Nobody But You.’ Mao ni gitug-an ni Elvis nako, sa pangutana kon unsay maglanoglanog nga tono unyag sugod sa kampanya alang sa lokal nga piniliay.

For updates from around the country, follow Sun.Star on Twitter

Gipasabot ni Elvis nga ang maong awit hilabihan ka sikat bisan ang mga gagmay’ng bata dali kaayong maka sanasana. Mao sab ni ang strategy sa mga handler sa pulitiko, magpabuhat og campaign jingle nga daling mahinumduman ug daling makat-onan sa mga bata.

Nganong mga bata man? Paminawa ang jingle ni Villar. Way duda nga bisan diha sa inyong panimalay ang mga gamay’ng bata makamao nga mokanta niini bisan kon wa sila makasabot sa mensahe sa kanta.

Lahi ang tonada sa maong kanta, apan klik kaayo sa masa. Balik ta sa “Nobody Nobody but You.” Dako ni og matampo sa mga politiko pagpadangat sa ilang mensahe ngadto sa mga botante.

Mas nindot pa gyud unta kong i-record ni og tarong di sama sa ubang recording nga akong nadunggan nga hilabihan ka lata og audio, puwerting bungola ug di na gyud hinuon masabtan ang mensahe. Ang rason kay nagmantinil man lang. Basin sakto na sa budget gikan sa politiko apan tungod sa daghang cut o pangurakot sa gisugo mao nga yabag kaayo ang kanta, way lami.

KAMPANYA

Gawas sa campaign jingle, ang atong mga stage performers sama sa mga dramaturgo nangandam na sab ron og pundo aron ipresentar sa entablado.

Di malalisnagkinahanglan man gyud og patapok sa tawo ang matag rally nga himuon sa mga politiko. Kini sila kay hanas og ilado na sab kaayo, maoy daling mabunlot apan kinahanglan sab nga gahinan og dagkong budget. Mao bitaw sab ni nakabati sa uban kay abi lokal man nga talent bayran lang sab ogbarato.

Akong awhag sa mga magduduwa sa entablado ayaw mo og sugot nga hapit na lang pangayuon ang inyong serbisyo. Kong makapaningil og mahal ang mga talent sa Manila nganong di man ninyo kini mahimo. Lupig ninyo nang taga Manila kay di man sila makamao mobinisaya. Samtang kamo maayo kaayong motabi sa binisya mao na hinuoy badgetan og gamay. Ang problema man sab aning uban nga talent nato sa Sugbo kusog sab kaayong mamohal.

Modawat bisan pila ka diyot, mao nga mabarato lang sab ang uban. Pero kamong mga politiko ilailaha sab ninyo ang inyong gipanguha nga entertainer. Kuhaa kadtong naa gyu’y abilidad.

INSURGENCY

Nakadawat ko og imbetasyon gikan kang Col. Raymundo Banares ang Commander sa 78th Infantry Batallion nga nagbasi sa Balamban, Cebu. May labot kini sa 22nd founding anniversary nga ilang gisaulog karong adlawa. Bisita nila si Gov Gwen Garcia.

Usa sa mga kalihukan mao ang pagpirma sa joint resolution nga nagdeklarar sa Sugbo nga luwas na gikan sa problema sa insureksyon. Itunol ni Col. Banares ngadto sa Cebu Provincial Peace and Order Council ang Internal Security Operations taliwala ning maong kaugmaran. Congrats Warriors!