CATARMAN, Northern Samar - Patay ang usa ka kawani sa lokal nga kagamhanan sa Catarman sa Northern Samar human gipusil sa wa mailhing responsable.
Samaran usab ang asawa niini kinsa dali gidala sa tambalanan.
Ang insidente nahitabo sa Barangay Bangkerohan ning lungsod, alas 5:30 sa hapon, Biyernes, Hunyo 21, 2019.
Giila ang namatay nga si Allan Barcelon, 43, kawani sa Municipal Disaster Risk Reduction and Management Office (MDRRMO).
Samtang ang naangol nga asawa mao si Salve Barcelon, 40, nanimuyo sa Barangay Makinley ning lungsod.
Base sa inisyal nga imbestigasyon sa mga niresponde nga kapulisan, sakay sa ilang motorsiklo ang magtiayon padung uli.
Pag abot sa lugar nga nahitaboan, kalit niabot ang wa mailhing responsable ug gipamusil ang magtiayon.
Nakaangkon og samad pinusilan sa ulo ang bana hinungdan sa hinanali nga kamatayon samtang ang asawa naigo sa lawas.
Dali gidala sa tambalanan ang asawa samtang naabtan nalang sa kapulisan ang bana nga nag buy-od daplin sa karsada.
Dali nisibat sa wa mahibaw-i nga direksyon ang mga responsable.
Wala pa'y nakuha ang kapulisan nga testigo sa maong insidente.
Padayon pa ang imbestigasyon ug pagsusi sa posibleng motibo sa krimen. (Superbalita Cebu)