Hello, madlang pipol! Congrats and best wishes kang Grace Abrenica ug Antonio Rivas, ug sa akong paryete nga si Arvinlex Latoreno nga gikasal pod ngadto kang Megan Lenorio nga taga Dujali, Davao del Norte.
Single pa ko bisan doble ang kadak-on sa akong lawas. Duna na pod koy kinse anyos nga lalaking anak tungod wa nakapugong niadtong ningtungtong sa bente singko ang akong pangidaron.
Nagmahay? Gamay. Syempre, nindot man gayud nga plastar ang relasyon nga gipanalanginan sa katilingban ug sa Ginoo. Apan, wala ko nagmahay nga aduna koy anak bisan buotan kaayo siya ha ha! Dili lalim apan dili pod ikapuli ang kalipay nga makakita ka sa imong liwat. Grasya ra gayud ni Lord- hallelujah!!!!
Bitaw, happy kaayo ko nga nasaksihan ang pagminyo sa akong higalag kaparyentehan. Si Grace ug Tonyo, sobra usa ka dekada una nagpasakal ESTE kasal. Si Arvinlex ug Megan, manag-uyab sud sa unom lamang ka bulan. Naay dugay, anaa poy dali apan dili ang seremonyas sa “kasal” ang labaw’ng importante. Agree?
Ang “kasal” usa lamang ka tikang ngadto sa kaminyuon o “marriage.” Sud sa pipila ka oras, human na ang programa o seremonya sa kasal; apan ang kaminyuon- “road to forever” ang byahe, igsuon.
Atong mamatikdan nga dinala sa pagbag-o sa panahon, ningduyog na pod ang mga Pinoy sa uso sa ubang nasud nga magbulag o magdiborsyo ang managtiayon. Dili ko mo-judge kay managkalahi kitag kombiksyon.
Sa tinuod, nalipay ko nga nakakita sa akong lolo Tacio ug lola Aida nga bisan kapin 70 na ang ilang pangidaron- sila pa gihapon. Tiniguwang seguro akong panglantaw apan taas ang akong respeto sa managtiayon nga nagpabilin sa ilang kaminyuon bisan ning agi sa grabeng hagit sa ilang relasyon.
Again, dili ko mohusga kay di man pod ko minyo. Wala man gani mi nagdugay sa papa sa akong anak kay irehis kog batasan. Unsa na lang kaha katong wa pay mga buot nga nagminyo kay na-pressure sa katilingban?
Akong pagtuo nga grasya sa ra Ginoo ang paglahutay sa kinabuhing minyo. Managkalain god tag personalidad unya nagpuyo - dili tingali sayon ang pag uyon mao iagi gayud kinig pag ampo, igsuon.
Congrats sa ginaksal ug kaslon. Tambag lang nga kung dili kaya, dili kinahanglan nga ang wedding bongga. Mas nindot pangandaman ang kaminyuon kay bisan sa kalisod o kaharuhay; ang magtiayon gayud ang mag-inunungay.