USA ka lalaki, nga nanghuraw sa kanhi niya uyab nga ipagawas ang iyang mga hubo nga hulagway human sila nagbuwag, ang naaresto sa otoridad, Huwebes, Hunyo 20, atol sa entrapment operation.
Siya nag-atubang og kaso nga paglapas sa Republic Act 9262 (VAWC) and Republic Act 9995 (Anti Photo and Video Voyeurism).
Ang babayeng giilang si Lyn, 21, graduating college student ug residente sa Emily Homes Subdivision, Barangay Cabantian, Buhangin, Davao City miadto sa istasyon sa pulis aron ireklamo ang iyang ex-bf nga nanghulga nga i-upload ang iyang hubo nga hulagway sa social media.
Mga alas 4:35 p.m., Miyerkules, ang Philippine National Police (PNP) Regional Anti-Cybercrime Unit (Racu)-Davao ug personahe sa 1105th Mobile Company, Regional Mobile Force Battalion (RMFB)-Davao miaresto sa suspek nga si Rashid Radjac, 25, Call Center Agent ug residente sa Purok 5, Barangay Magnaga, Pantukan, Compostela Valley Province, apan nangabang sa Bonifacio Extension, Davao City.
Atol sa operasyon, nakumpiska sa otoridad ang usa ka unit sa mobile phone nga Asus 2 Zenfone; Skandisk SD Card; sim cards.
Sa report, gibutyag sa reklamante nga nagsugod siya sa pagdawat og mga pagpanghulga sa nga text gikan sa suspek human niya kini gibuwagan.
Ang suspek gidala sa PNP Racu-Davao office. (JCR)