GIHUPAY sa usa ka opisyal sa panglawas sa probinsiya sa Compostela Valley ang mga kahadlok nga dunay nikuyanap nga sakit nga meningococcemia sa probinsiya.
Kihi human sa giingong kamatayon sa usa ka tinun-an sa Grade 7 sa Monkayo National High School (MNHS) nga gisuspetsahan nga tungod sa maong balatian.
Si Dr. Antonio Ybiernas, Compostela Valley provincial health officer II, nagsulti pinaagi sa paghinabi sa telepono Biyernes, Hunyo 21, nga ang isyu way angay nga ikabalaka basta kadtong tanan nga “have close contact” sa sakit nasubay ug nahatagan og prophylaxis.
“The case was still a ‘suspected’ case of meningococcemia because wala na laboratory test ang bata kay nag-arrest dayon siya unya namatay,” tug-an ni Ybiernas.
Iya sab nga gitin-aw nga ang meningococcemia dili dala sa hangin apan pinaagi sa “droplets”, kon diin gipananglitan nga kon ang gisuspetsahan nga nagdala sa kagaw niubo o nagsikma ug ang pinisik niini nahiadto sa laing indibiduwal.
Matud niya nga gawas sa prophylaxis, ang maayong pagpugong sa sakit mao ang saktong “hygiene” o kalimpyo.
“Para sa akoa, pwede naman sila mobalik og eskuwela, there is no need to panic kay tanan naman nga na-close contact sa bata kay na-trace na ug nahatagan na og prophylaxis,” paghupay ni Ybiernas ug dugang nag-ingon nga kinahanglan ang tanan himuong kinaiya ang paghugas sa kamot sa tanang higayon gawas sa pagkaligo matag adlaw.
Sayo niini, ang munisipalidad sa Monkayo, sa iyang Facebook page, nagpahibawo sa pagsuspende sa tanang lebel sa klase sa MNHS ug ang Monkayo Central Elementary School sugod Biyernes, Hunyo 21, hangtud sa dugang pahibawo human ang Grade 7 nga tinun-an sa MNHS tungod matud pa sa gisuspetsahan nga meningococcemia niadtong Hunyo 19.
Sa Facebook page sa Local Government Unit sa Monkayo, gibutyag nga ang mga tinun-an sa MNHS Grades 7-9 gitambagan nga moreport ngadto sa buhatan sa prinsipal sa buntag sa maong adlaw aron nga mopailawom og saktong medical procedure subay sa tambag sab sa municipal health office.
Dugang pa, gikaingon sab nga ang munisipalidad, uban sa iyang Health Team nga gimugna alang sa maong tumong, nilusad og subsob nga prophylaxis treatment ngadto sa tanang Grade 7, 8, 9, ug 10 nga tinun-an sa maong eskuwelahan base sa mando ni Monkayo Mayor Ramil L. Gentugaya.
Sa paghinabi Biyernes uban ni JA Crizaldo, Monkayo information officer, siya nagkanayon nga ilang gitarget ang mga tinun-an sa Grade 7, 8, ug 9 sa MNHS aron mapugngan ang makatakod nga sakit nga modebelop ug mokatap.
Gitug-an niini nga dunay magamit nga 10 ka mga karton sa tambal nga puwede sa 2,000 nga tinun-an.
“This is a precautionary measure. Kasi if it is indeed meningo, it will stop the spread,” pagklaro ni Crizaldo.
Sa taho gikan sa Philippine Information Agency-Compostela Valley nagbutyag nga ang munisipyo nagdapat og prophylaxis ngadto sa pamilya namatay, naglakip niadtong nakaduol kaniya, subay sa gibutyag ni Emiliano Bacaro Jr., ang Monkayo Municipality communicable disease coordinator.
Nilusad sab ang Health Team ug subsob nga information drive kon unsaon pagpugong ug kontrol sa meningococcemia.
Ang meningococcemia maoy naingnan sa kagaw nga gitawag og Neisseria meningitis.
Ang komon nga simtomas naglakip sa kalintura, labad sa ulo mga lipaka sa mga gagmay nga lama, pagkalipong, iritable ug kabalaka.
Masabwag ang sakit pinaagi sa direktang kontak sa mga distsards gikan sa ilong ug tutunlan.