BAG-O lang nga gisaulog sa nasod ang kasumaran sa Edsa People Power Revolution, ang malinawong rebolusyon nga mora lang gani og picnic apan maoy nakapalagpot sa usa ka diktador.
Usa sa mga power players sa Edsa I, si kanhi presidente Fidel V. Ramos, niingon nga ang makasaysayong rebolusyon wa panag-iyaha sa usa lang ka pamilya – ato ning tanan.
“Edsa is not an exclusive property of one party, color, unit or commander. Edsa is for every Filipino,” matod pa ni Ramos.
Maayo nga nipahinumdom si Presidente Ramos niini kay morag dunay pamilya nga nagtoo nga silay tag-iya sa Edsa.
***
Ang ako man gong gikabalak-an nga samtang nagpadayon ang malinawong rebolusyon didto sa Edsa, daghang mga tawo nga wa didto apan ang ilang mga kasingkasing ug pagbati nahiusa niadtong mga tawo nga tua didto sa Edsa.
Ang Edsa nga usa ka dalan usa lamang ka simbolo sa pagbati sa katawhan nga sa katapusan nibarog batok sa usa ka diktador.
Bisan asa kang dapita sa Pilipinas, kon niadtong tungora, niadtong taknaa, nipagawas ka sa imong pagbati batok sa diktador, nahiusa ka sa lawod sa katawhan didto sa Edsa.
***
Wa hinganli ni kanhi Presidente Ramos kon kinsang pamilya ang niangkon sa Edsa.
Apan dayag kaayo nga si Senador Noynoy Aquino, kandidato sa agkapresidente sa Liberal Party, maoy gipasabot kay ang tanang motif, morag nahisubay man sa gusok sa Edsa People Power Revolution.
Normal lang kana nga gimmick sa politika. Ang akong pagtuo mao nga ang bag-ong Edsa Revolution mao ang eleksyon kay mao kini ang malinawong paaagi subay sa balaod sa pa-ilis sa mga namunoan nga wa na mauyoni sa katawhan.
***
Makapahimuot ang mga politiko kay hasta sa ilang mga slogan manag-ilog.
Si Senador Noynoy Aquino niingon nga siya maoy orihinal ug nag-una nga nigamit sa slogan nga “Hindi ako magnanakaw” ug namasangil nga gikopya kini ni
Senador Manny Villar. Gipasanginlan man gud si Villar nga nakasapi sa iyang C-5 highway extension busa namalibad siya sa pag-ingon nga “Hindi ako nagnakaw.’
Porbida, ayaw kog ingna nga hasta slogan kawaton pa gyud.
Kon dunay moingon nga di siya kawatan, o di siya mangawat, nagpasabot ba na nga ang uban mga kawatan o mangawat?
***
Sumala sa labing ulahing survey sa Pulse Asia, nigawas nga si Villar maoy mas kasaligan sa mga botante kay ni Aquino.
Nunot niini, nigawas usab sa survey nga nitibugsok ang pagsalig sa mga tawo ni Presidente Gloria Macapagal-Arroyo nga sumala pa sa mga batid sa politika, mamonbon kadtong kandidato sa pagkapresidente nga iyang i-endosar.
Mao na kini ang tukmang panahon alang kang kanhi Defense Secretary Gilberto “Gibo” Teodoro nga mohangyo sa Presidente nga ipa-endosar ang iyang tanang mga kontra aron siyay modaog sa pagkapresidente.