Mga duwa karun Hunyo 23, 2019
4:30 pm- Columbian Dyip
batok Rain or Shine
6:45 pm- Ginebra
batok NLEX
Mabunyagan isip bag-ong sakop sa Brgy. Ginebra Gin Kings ang makapaukyab nga pointguard nga si Stanley Pringle batok sa NLEX Road Warriors sa main game karong gabii sa out-of-town game sa Philippine Basketball Association (PBA) Commissioner’s Cup sa Batangas City Coliseum.
Dili pa lang dugay, nakuha sa Gin Kings si Pringle gikan sa NorthPort Batang Pier pinaagi sa blockbuster trade.
Isip baylo, nakuha sa Batang Pier ang mga beteranong sila si Sol Mercado ug Jervy Cruz lakip na ang batan-ong si Kevin Ferrer.
Mao pa lang kini ang ikaduhang duwa ni Pringle sa tibuok season human siya gipaubos og operasyon sa iyang tiil.
Wala pa siya nabalhin sa Ginebra, si Pringle wala nakapakita og aksyon sa nag-unang duha ka mga duwa sa Batang Pier ning maong komperensya.
Unya sa ikatulong duwa sa Batang Pier, nakabalik na si Pringle ug nagpakatap kini’g 22 puntos sa kadaugan batok sa TNT KaTropa, 110-86.
Ang Road Warriors miangkon nga grabe ang ilang pagpangandam ning duwaa gumikan kay nasayod silang moduwa na si Pringle sa Ginebra.
“It’s an out-of-town game and we have to prepare hard especially as Stanley (Pringle) is already playing for them as I understand,” matod ni NLEX coach Yeng Guiao.
Ang Road Warriors kasamtangang nagkagidlay dala ang 1-6 nga rekord.
Sa premirong duwa, magsangka ang Columbian Dyip batok Rain or Shine Elasto Painters. (ESL)