NINGBANGON gikan sa pagkapandol ang Cebu City Sharks ug ilang gipahimungtan ang Marikina Shoemasters, 50-42, niadtong Biyernes sa gabii, Hunyo 21, sa Maharlika Pilipinas Basketball League (MPBL) Lakan Cup sa Marist School Gymnasium sa Marikina.
Sama sa naandan, ang Sharks gipangulohan na sab ni John Patrick Cabahug pinaagi sa iyang 14 puntos ug tulo ka rebounds.
Si William McAloney nidugang og siyam ka mga puntos alang sa Sharks samtang ang bag-o nilang sakop nga si ex-PBA Eliud Poligrates nihatag og unom ka mga puntos.
Ang Shoemasters gipangulohan ni Justine Padua pinaagi sa iyang 10 puntos samtang nitunol og walo ka mga puntos si Daryl Pascual.
Ang Sharks, nga nasubhan og 71-75 nga kapildihan batok sa Bulacan Kuyas, nakapagawas og maayong senyales kabahin sa ilang kampanya ning maong season. (EKA)