Mga duwa karon
1:00 pm- SHS-ADC
batok USPF (high school)
2:30 pm- UC
batok USJR (high school)
4:00 pm- UV
batok USC (college)
Langkaton og suway sa ARQ Builders-University of the Visayas (UV) Green Lancers ang ikaduhang nilang daog sa samang gidaghanon nga mga duwa sa ilang pagpakigbatok sa Cebu Landmasters-University of San Carlos (USC) Warriors sa main game karong hapon sa Cebu Schools Athletic Foundation Inc. (CESAFI) 2019 Partner’s Cup college division sa Cebu Coliseum.
Ang Green Lancers ningsalmot og torneyo sa Mindanao hinungdan nga karon pa kini nakabalik og duwa human nila gipanglampornas ang Cebu Institute of Technology University (CITU) Wildcats, 92-62, niadtong Hunyo 9.
Kon yano nilang napukan ang Wildcats sa premiro nilang duwa, gilauman nga makasugat ang Green Lancers og malisod nga tahas batok sa Warriors.
Ang Warriors, usa sa gikahadlukang mga puwersa sa kompetisyon, kasamtangang naggunit og 3-1 nga rekord.
Sa high school division, magsangka sa premirong duwa ang Cebu Landmasters/Sacred Heart School-Ateneo de Cebu (SHS-AdC) Magis Eagles batok University of Southern Philippines Foundation (USPF) Baby Panthers.
Mosunod ang engkuwentro sa Hotel Fortuna/University of Cebu (UC) Baby Webmasters batok University of San Jose Recoletos (USJ-R) Baby Jaguars. (ESL)