HUMANA ang kasaulogan sa ilang pagkahimong kampiyon sa National Basketball Association (NBA) sa labing unang higayon ug humana sab ang rookie drafting, panahon na aron magtutok ang Toronto Raptors sa usa ka dakong lakang – mahaylo si Kawhi Leonard nga magpabilin.
Gilaumang molugnot si Leonard sa katapusang tuig sa iyang kontrata aron mahimong free agent karong Hunyo 30. Ang two-time NBA Finals MVP ug three-time All-Star gikonsiderar nga maoy labing ilugan sa free agency.
Ang Raptors adunay kapasidad nga makatanyag kang Leonard og lima ka mga tuig nga kontrata nga magbalor og $190 million, labaw og usa ka tuig ug $50 million sa labing dako nga puwedeng matanyag sa ubang teams.
Bisan nagpadayon pa ang ilang kasaulogan, ang kadagkuan sa Raptors hinayhinay nang nagplano sa ilang lakang nga pagabuhaton aron mahaylo si Leonard aron magpabilin sa ilang tugkaran.
“We obviously want to put a couple of special touches on it,” matod ni general manager Bobby Webster.
“But, yeah, we’re comfortable. Throughout the year we’ve been talking about the things that we can offer and what made this season so special. I think we’ll just continue that.”
Gumikan kay gipangandaman nang daan sa Raptors ang pag-abot ning panahuna, hayan gilaumang dili sila maglisod sa paghaylo sa makonsiderar nga labing importanteng magduduwa sa ilang kasaysayan isip usa ka puwersa.
“There’s a ton of thoughts and ideas,” pasabot ni Webster. “And so collecting those and putting them a little bit more in a presentation, or kind of a little bit more in order will help, even in our brains as we start to think about all the different ways to pitch him.”
Nagkanayon si Leonard nga wala ra siya mabalaka inig abot sa adlaw nga kinahanglan na niyang buhian ang iyang dakong desisyon.
“You don’t need too many days to figure it out,” pasabot ni Leonard. “We’ll see what happens. Once that time comes, then we’ll all lay the pros and cons out.”
Si Leonard nag-average og 26.6 puntos ug 7.3 rebounds sa regular season unya misaka kini sa 30.5 puntos ug 9.1 rebounds sa playoffs. Ang maong mga numero pulos iyang mga career-best.
Gawas kang Leonard, nagtinguha sab ang Raptors nga madani nga magpabilin kanila ang ilang sentro nga si Marc Gasol.
Si Gasol, kinsa nakuha sa Raptors gikan sa Memphis Grizzlies pinaagi sa trade, nakatampo og dako aron maangkon sa Raptors ang kampiyunato.
Labing seguro, buhaton sab sa Raptors ang tanan nilang makaya aron magpabilin si Gasol sa ilang balwarte. (AP, ESL)