ANG umaabot nga International Waterski and Wakeboard Federation (IWWF) Wakefest Series 2019 Philippines Stop sa Deca Wakepark Clark sa Clark, Pampanga magsilbi nga “acid test” alang sa Davao City rider Maiquel Jawn “Mikee” Selga nga buot moangkon og luna sa Southeast Asian (SEA) Games-bound national wakeboard team.
Ang 19-anyos nga Malayan Colleges Mindanao Multi-media arts freshman nagsulti nga magsilbi kini nga qualifying tournament sa national team.
“Parang pre-games, practice competition for the SEA Games,” suma sa 2015 SEA Games double bronze medalist.
Malaumon sab siyang i-excuse siya sa tunghaan gikan sa iyang klase alang sa Hulyo 27-28 nga kompetisyon, diin gikinahanglan siyang magbansay una ang torneyo.
Suma niya, “I have Saturday class pa po kasi pero balita ko supportive naman ang Malayan sa mga ganito.”
Plano ni Selga nga magtraining sa Deca Wakeboard Park sa Barangay Tacunan, Tugbok District diin buntag lamang ang iyang klase sa matag adlaw.
Napahimuslan niya ang libreng training tungod sponsored rider siya sa Deca Wakeboard Park.
“Sana po makapasok (ulit sa national team),” dugang sa two-time SEA Games campaigner.
Una niyang gisuwayan ang wakeboarding dihang 10-anyos pa siya, diin sa pagdasig sa iyang Ninong Dexter Tan ug uyuan nga si Gelo Cordero, nga usa sab ka rider, gisuwayan niya kini.
Pipila sa naangkon niyang kadaugan ug titulo gikan sa Asian Wake Park Tour 3rd leg sa Lago de Oro, Batangas niadtong 2011, The Board Shop Cable Jam sa Phuket Cable Ski sa Phuket, Thailand sa samang tuig, Asian Wake Park Tour first leg sa Thai Wake Park, Bangkok, Thailand niadtong 2012, Bohol Wake Jam 2010, Asian Wake Park Tour 2nd leg niadtong 2012, Philippine Qualifier Series first and second legs sa Lago de Oro and Deca Wakeboard Park, WWASP Cable Wakeboard National Championship sa Deca Wake Clark Cable Park sa Angeles City, Pampanga niadtong 2013 ug 7th Philippine Cable Wakeboard Nationals sa Laguna.
Bag-uhay lamang siyang mi-gradwar sa Senior High School sa San Pedro College.