USA ka matinahuron ug manggiuwawon kung siya paminawon sa telepono, apan ang tibuok pakigistorya niya naghisgut sa biochemistry ug food chemistry.
Gipaambit ni Pete Maverick Nicole Estudillo ang dako niyang interes sa maong natad ug tuod man, ang kaalam niya sa maong butang, rason nga siya ang unang summa cum laude sa University of the Philippines Mindanao o UP Min.
Si Estudillo migradwar, Biyernes, Hunyo 21, ning tuig sa kursong BS Food Technology uban ang Cumulative Weighted Average Grade (CWAG) nga 1.1971.
Kini ang pinakataas nga rekord sa unibersidad, sukad naestablisar, 24 ka tuig ang nakalabay.
Sa pakighinabi sa SunStar Davao gisulti niini wa pa kaayo motuhop kaniya nga siya mihimo og kasaysayan sa unibersidad.
Kinamaguwangan nga anak ni Ivy Estudillo, siya naggugol sa iyang high school years sa International Christian School sa Bangkal, Davao City.
Niya, ang damgo lamang niya kaniadto nga mopasar sa University of the Philippines College Admission Test (UPCAT) diin suma niya lisud ang eksam.
Sukad high school, hilig na ni Estudillo ang biology ug chemistry rason nga gipili niya ang Food Technology atol sa UPCAT application.
“Since I was a kid, I love playing with my food. It doesn’t sound too nice but I really do. For one, I know sugar is carbohydrates but I learned here that it’s more complicated than that and I found these learning to be amazing,” suma niya.
Sa kolehiyo, partikular siya sa food chemistry ug biochemistry.
Sa iyang thesis may titulong “Antioxidant and Anticancer Potential of Artocarpus Fruit Wastes”, giisplikar ni Estudillo nga nakapokus siya sa food wastage and health-related problems.
Gi-tsek niya ang antioxidant ug anti-cancer potentials sa locally-produced fruits sa Mindanao.
“Sa industry, daghan og waste during processing so I tried to look into this waste if we can add value to them and tried to work it out with health-related problems like cancer,” dugang niya.
Ang tibuok tuig nga pagtrabaho niya sa iyang thesis, mihatag og maayong bunga, diin ipresenta niya ang iyang research sa Food and Nutrition Institute (FNRI) competition sa Hulyo sa Pasay City.
Nagtuo si Estudillo nga ang maayong UP graduate ipaambit sa komunidad ang unsa mang nakat-unan niya sa unibersidad.
Sa FNRI competition, malaumon siyang mas daghang tawo pa ang interesado sa iyang research diin makamugna kini og dugang pagtuon nga mohimo pa og theses nga benepisyal sa kadaghanan.
Apan ang unang summa cum laude sa UP Min wa lang nagtuyok ang kinabuhi sa unibersidad, libro ug sa klase.
Siya, aktibo sab sa pagsalmot sa mga organisasyon diin makatampo siya og kaayuhan.
Miyembro siya sa Rotaract Club of UPMin, Let’s Do It Philippines Youth – Davao, Psalm Ministry of UP Min, For the Unity and Solidarity of Every Student in UP (Fuse Up), organisasyon nga nagtigum sa tanang religious organizations sa UP Mindanao.
Si Estudillo usa ka soprano nga nagkanta sa UPMin Koro Kantahanay.
Sa iyang senior year, usa siya sa exchange students ilawom sa Trans-Asean Global Agenda Education (TAG) – AIMS Program nga gipadala sa University of Tsukuba, Japan, Oktubre 2017 ngadto Pebrero 2018 uban ang laing estudyante nga may kursong Food and Science and Technology discipline.
“Importante na naay mga extra-curricular activities because with these organizations, you learn to follow and you also learn how to lead. You learn to mingle with people which is kana man pud atong tumong after we graduate,” sigun ni Estudillo.