GIBUTYAG sa Provincial Disaster Risk Reduction and Management Council (PDRRMC) sa Davao Occidental nga luwas na ang duha ka mga nawalang mananagat human gianod sa kusog nga balod ang ilang sakayan tungod sa daut nga panahon.
Si Harry Camoro, PDRRMC action officer, nagsulti nga nakit-an na sila si Milando Mamaba Yurdan, 41, ug Brindo Panugol Dipareni, 43, pulos molupyo sa Malita, ang kapital sa probinsiya.
Si Camoro nagbutyag adlaw’ng Sabado, Hunyo 22, nga napugos nga mopalawod ang duruha tungod sa kapobrehon bisan daut ang panahon.
Migikan ang mga nahisgutan sayo sa kaadlawon niadtong Biyernes, Hunyo 21, aron mopalawod sa Davao Gulf, apan sa ilang paghidangat sa tunga-tunga sa kadagatan, kalit mitaas ang balod ug mikusog ang hangin hinungdan nga mipadung na ang ilang bangka sa habagatang bahin hangtud nga midunggo sa Marore Island sa nasud Indonesia, mga 4-5 oras ang biyahe gikan sa lungsod sa Sarangani.
Si Milando nagbutyag nga hayag na ang adlaw dihang miabot sila sa maong lugar human ang duha ka oras nga paglawig sa lawod diin wa silay nakita nga isla taliwa sa kangitngit sa kadagatan.
Gitataw niiini nga una nilang gisundan ang usa ka barko sa paglaum nga padung kini sa siyudad sa Davao apan tungod kay nabalaka nga mahutdan og gasolina mao nga iya na lamang gipawong ang makina ug gihuwat ang kahayag hangtud nga nahidangat sa Indonesia.
Gitataw niini nga nakighinabi sila sa usa ka lalaki diin nasabtan nga sila mga Pilipino mao nga paspas kining milakaw ug nangayo og tabang sa mga awtoridad.
Human sa pipila ka minuto, nag-alayon ang mga awtoridad sa Indonesia ug ang Philippine Navy diin daling giatiman ang mga mananagat pinaagi sa paghatag og pagkaon, tambal ug gipailawom sa dokumentasyon.
Si Camoro sab mao ang mitabang sa pagpahibawo sa Philippine Navy Coast Watch station sa Balut Island aron pahibaw-on ang Philippine Navy station sa Indonesia sa nahitabo human nabalaka ang mga pamilya sa mga biktima.
Gilayong mihimo og lakang ang Philippine Coast Guard nga gipangunahan sa opisyal nga si Robert Tadalan Nieto hinungdan nga luwas nga nahatud pauli ang mga biktima.
Subling gipahimagnoan sa PDRRMC ang ilang mga mananagat sa lugar nga di mopalawod sa taknang magdaut ang panahon. (Orlando B. Dinoy)