USA sa wa kaayo mahatagi og pagtagad sa akademiya, labina sa physical education, mao ang pagkat-on unsaon sa pagbiseklita. Bitaw, dinhi sa Pilipinas, ang pagkat-on og biseklita nag-agad ra sa matag pamilya. Apan alang nako, usa unta ni sa skills nga angay itudlo sa mga tunghaan.
Nahinumdom man gud ko sa among klase sa Physical Education sa nagtungha pa ko sa kanhi Cebu State College (karon Cebu Normal University). Sa us aka semester, gipakat-on mi og skating sa among instructor. Busa, mangadto mi kada semana sa Cebu Coliseum diin adto mi makaabang og roller skates.
Alang nako, wa ni kapuslanan kon maghisgot ka og kinabuhi. Lingawlingaw ra ni nga skill. Lahi sa biseklita nga magamit nga transportasyon, labina panahon sa mga katalagman, kanus-a lisod ang transportasyon.
Di na usab lisod ang pagkat-on og motorsiklo o scooter kon ikaw kahibawo nga mobiseklita. Ang imong buhaton mao na lang ang pagkat-on unsaon sa pagpadagan. Makuyaw kon modiretso kag kat-on sa pagpadagan og motorsiklo kon wa kay basic sa bicycle handling. Mas kuyaw sa disgrasya.
MAS KAPUSLAN
Sa mga dapit nga nihit o mahal ang transportasyon, labina sa kabukiran ug kaislahan, ang biseklita gamit kaayo. Instead maglakaw ang mga bata, magbiseklita sila. Di kuyaw ang biseklita sa mga lugar nga layo sa sentro sa sibilisasyon, diin gamay ra ang motorized nga mga sakyanan.
Tinuod nanaghan ang mga motorsiklo ug scooter sa hilit nga mga dapit. Apan mahal ang plete. Bisan sa tag P10 nga adlaw, dako na kini nga gasto sa usa ka kabos nga pamilya.
Kon ang usa ka pamilya dunay biseklita, imagine sa madaginot niini sa pletihan. Busa, ang P3,000 nga magasto niini alang sa pagpalit og biseklita, dako na kaayo og tabang nga makuhaan ang galastuhan sa pagtungha.
Wa man gud kinahanglana nga mopalit ka og brand new nga BMX. Naay daghang surplus bikes gikan sa Japan nga mapalit nimo sa mao nga presyo. Interior ray imong ilisan, katuigan na nimo kining magamit.
LOCAL GOVERNMENT
Ang biseklita usa sa wa makita nga alternatibong transportasyon sa hilit nga mga lugar. Maanindot unta kon kini himuon nga major nga proyekto sa local government units sa kalungsoran.
Pinaagi sa koordinasyon sa Department of Public Works and Highways (DPWH), butangan og bike lanes ang mga karsada alang sa mas luwas nga pagbiseklita sa kabataan. Sa samang higayon, edukahon ang mga driver kalabot niini aron sila na mismo mohimog lakang nga malikayan ang disgrasya.
Makaguol huna-hunaon nga ang balor sa simple nga matang sa transportasyon wa makita sa kadagkoan sa kagamhanan isip simple nga solusyon sa kakuwang sa transportasyon.
Sama ra usab ni sa nahitabo sa sidewalk sa kadalanan nga wa gihapon makita ang kamahinungdanon isip feature sa karsada alang sa kaluwasan sa mga pedestrian ug walkability sa usa ka dapit. Simple nga mga solusyon sa dakong problema, apan wa makit-i sa kagamhanan.