GIBALHOG sa bilanggoan sa Malabuyoc Police Station ang 57 anyos nga lolo human gitudlo sa iyang 17 anyos nga dalaga niyang apo nga nanglugos kaniya sa maka duha ka mga higayon.
Ang katapusang pagpang lugos nahitabo Huwebes sa gabii, Hunyo 20, 2019, gikan nagsag-ob og tubig ang biktima.
Matod ni Police Patrolman Abel Fuentes, desk officer sa Malabuyoc Police Station, nga padung na unta mopauli si Jessa (di tinuod niyag ngan) dihang iyang nasugatan ang iyang apohan.
Kalit lang siya nga gigunitan ug gibira paingon sa hilit nga dapit sa usa ka barangay sa lungsod ug didto gilugos.
Tungod sa ikaduhang gihimo sa iyang apohan, wa na siya makaantos pa, iya na kining gitug-an ngadto sa iyang amahan.
Biyernes sa buntag, Hunyo 21, gidala sa amahan ang iyang anak ug gitug-an ngadto sa kapulisan ang pagpanglugos .
Dali nga nilusad og manhunt operation ang Malabuyoc Police Station ug naabtan ang apohan sa balay niini.
Gitug-an ni Jessa sa imbestigasyon sa Women and Children Protection Desk nga niadto pang Pebrero ang unang pagpanglugos.
Wa siya motug-an sa iyang mga ginikanan tungod sa kahadlok sa bahad sa iyang lolo nga iyang pamatyon ang tanang miyembro sa pamilya niini.
“Nahadklok ning bata pagtug-an sa iyang papa kay gibaharan man daw ni nga patyon tanan miyembro sa pamilya,” asoy ni Fuentes sa Superbalita Cebu.
Gihimakak sa apohan nga iyang gilugos ang iyang apo kay sinabutan nila ang hitabo.
Nitug-an ang suspek kang Fuentes nga iyang hinatagan og kwarta ang dalaga ug mosugot matod pa kini nga maghilawas silang duha.
“Hinatagan man daw niyag kwarta ning bataa ingun aning lolo. Wala daw na niya lugosa kay nagsabot kuno matod niya,” dugang ni Fuentes.
Apan ang mga ginikanan sa dalaga mopasaka og kasong pagpang lugos batok sa suspek.