HEPE sa Cebu City Police Office nga si Police Colonel Royina Garma hulipan na sa katungdanan human giingong mopahimulos sa early retirement sa Philippine National Police (PNP) tungod sa nagpaabot niya nga dakong posisyon sa gabinete ni President Rodrigo Duterte.
Bisan si Police Regional Office (PRO) 7 Director Police Brig. General Debold Sinas nikompirmar nga nakadungog na siya niini.
Atol sa rank inspection sa CCPO sa Sabado sa buntag, Hunyo 22, daw sa nanamilit na ang babayeng director sa iyang mga sakop, sigun sa usa ka kasaligang tinubdan.
Iyang giawhag ang mga pulis nga higugmaon nila ang ilang trabaho alang sa kaayohan sa PNP organization, pamilya, siyudad ug tibuok nasud.
Si Cebu City Councilor Joel Garganera, kasamtangan nga chairman sa Cebu City Advisory Council ug suod ni Garma, sa iyang Facebook post, nagkanayon nga duha ka semana gikan karon mahimo nang general manager sa Philippine Charity Sweepstakes Office si Garma.
Gisuwayan pagkuha sa iyang habig si Garma sa Superbalita Cebu, apan wa siya nitubag sa tawag sa telepono.
Apan si Sinas nagkanayon nga nakadawat na siyag report nga hulipan na si Garma.
Iyang gitug-an nga madestino sa usa ka taas nga posisyon sa gobyerno ang iyang CCPO director.
“We are waiting for the official report or orders for her. We withheld the announcement, but we have already an advance information,” matod ni Sinas.
Una nang giangkon ni Sinas nga adunay mahitabong revamp sa PNP sa mosunod nga mga semana ilabi na nga adunay mga moretiro sa ilang serbisyo.
Karong Martes, Hunyo 25, gitakdang ipahigayon ang turn-over of command sa Cebu Provincial Police Office diin mo lingkod na ang bag-ong provincial director nga si Police Colonel Roderick Mariano gikan sa National Capital Region Police Office (NCRPO). (AYB)