MOKABAT sa 3,650 gramos nga shabu ug 110,580 gramos sa marijuana nga dunay kinatibuk-ang Dangerous Drugs Board (DDB) value nga P30.9 million ang nasakmit sa Cebu Provincial Police Office (CPPO) gikan sa Abril hangtod sa Hunyo 2019.
Nasakmit ang mao nga gidaghanon sa illegal drugs sa 504 ka mga operasyon nga gihimo sa CPPO, nga nisangko sa pagkasikop sa 675 ka mga tawo.
Ang kapulisan naka-file usab og 838 ka drug-related nga mga kaso sa nakalabay nga tulo ka mga buwan.
Mao kini ang pipila ka mga kalambuan nga gibutyag atol sa presentation of accomplishments sa ikaduhang quarterly Provincial Anti-Drug Abuse Council (Padac) meeting niadtong Huwebes, Hunyo 20.
Mga mayor sa kalungsoran, Municipal Anti-Drug Abuse Council focal persons ug mga sakop sa Padac gikan sa National Government agencies nangapil sa tigom nga gipangulohan ni outgoing Gov. Hilario Davide III.
Gawas sa CPPO, ang Philippine Drug Enforcement Agency (PDEA) Central Visayas nihatag og updates sa mga barangay drug clearing operation.
Hangtod sa Hunyo 17, 19 lang sa 1,066 ka mga barangay sa lalawigan ang wa maapektuhi sa illegal drugs.
Mokabat gihapon sa 1,047 ka barangay ang apektado sa drugas, samtang 245 ka mga barangay sa lalawigan ang nadeklarar nga drug cleared sa miaging tuig.
Matod sa operational accomplishment report sa PDEA, sila nakapahigayon og 44 ka mga operasyon gikan sa Enero hangtod sa Hunyo 20. Ang mao nga gidaghanon naglakip na sa joint operations tali sa kapulisan.
Si Cebu Provincial Anti-Drug Abuse Office (Cpadao) Head Carmen Remedio Durano-Meca, sa iyang bahin, nihisgot sa inauguration sa New Life Center sa lungsod sa Pinamungajan.
Usa ka hiniusang proyekto sa Capitol ug Globe Telecom, ang New Life mao ang unang rehab facility sa Sugbo nga pagadumalahon sa Provincial Government. (RTF sa Sunstar Cebu )