LUWAS nga imnon ang tubig nga mogawas sa gripo sa 12 ka mga tunghaan sa dakbayan sa Sugbo nga nag-negatibo sa fecal coliform human gipaubos sa water sampling sa Metropolitan Cebu Water District (MCWD).
Ang MCWD nipaubos sa 15 ka mga tunghaan sa Sugbo og water sampling aron masiguro nga luwas nga mainom ang tubig sa gripo niini.
Tampo kini sa MCWD sa niaging Brigada Eskwela niadtong buwan sa Mayo. Matod sa tigpamaba sa MCWD nga si Charmaine Rodriguez-Kara nga gisugdan nila ang pagpanguha sa water samples niadtong Mayo 28.
Lakip sa mga tunghaan nga nag-negatibo sa fecal coliform mao ang Banilad Elementary School, Barrio Luz National High School, Lahug Elementary School, Tejero Elementary School, Abellana National High School, Cebu City Central School, Labangon Elementary School, Basak Community School, Pardo Elementary School, Guadalupe Elementary School, ug Punta Princesa Elementary School. (HBL)