NANUMPA na sa ilang katungdanan niadtong Biyernes, Hunyo 21, ang napiling mga konsehal sa north ug south district nga kaalyado sa Bando Osmeña Pundok Kauswagan (BOPK) isip preparasyon sa ilang paglingkod karong Hunyo 30.
Nitunga ang tanang mga konsehal nga nidaog gawas lang kang Konsehal Dave Tumulak, kinsa nipadayag na sa iyang pagsuporta sa umaabot nga administrasyon ni Mayor-elect Edgardo Labella.
Wa sab silla si north district Representative Raul del Mar ug south district Representative Rodrigo Abellanosa.
Si Abellanosa wa makatambong sanglit apil siya sa delegasyon sa 108th Session of the International Labour Conference and the Centennial Celebration of the United Nations sa ilang headquarters sa Geneva, Switzerland.
Si Del Mar wala pa makatubag sa gipadala nga mensahe niining mantalaan kon nganong wa siya makatambong sa oath taking.
Si re-elected Senator Sonny Angara, presidente sa Laban Ng Demokratikong Pilipino (LDP) nga maoy partido nga gisandigan sa BOPK, maoy nipahurar sa walo ka mga kandidato sa Cebu City Sports Club.
Si outgoing Mayor Tomas Osmeña nagpasalamat kang Angara, kinsa nituyo lang og anhi Sugbo para sa maong kalihukan.
Ang mga ningdaog gi-congratulate ni Osmeña.
Iyang giasoy atubangan sa mga barangay kapitan pinangulohan ni ABC President Franklyn Ong ug Angara nga ang nakalabay nga eleksyon maoy labing lisod nga iyang naagian.
Wa na mo-detalye og maayo ang amahan sa BOPK apan iyang gisaysay ang pag-paarak sa wa mailhing mga tawo sa balay sa upat ka mga kapitan nga iyang kaalyado nga iyang gihulagway nga harrasment.
‘YOU HAVE MY SUPPORT’
Si Tumulak, kinsa kaalyado sa BOPK apan sakop sa Nacionalista Party ni Senator-elect Cynthia Villar, nipadayag na sa iyang suporta sa umaabot nga administrasyon.
“I therefore extend my hand of reconciliation with all members of the City Council, with the newly elected ones regardless of political affiliations and most importantly to the incoming Mayor Edgar Labella, you have my support,” matod ni Tumulak sa iyang Facebook account. (PAC)