MAKAKURAT ang balita nga si kanhi Medellin Mayor Ricardo Ramirez gipatay sulod sa kwarto sa ospital diin siya nagpabilanggo sukad sa miaging tuig. Mas makakurat ang kadaghan sa killers, labing minos 15 ka mga tawo nga pulos armado, naka bullet proof vest ug luwan sa upat ka mga sakyanan, tulo niini sports utility vehicles (SUV).
Sa mga tawo nga didto sa Bogo-Medellin Medical Center, ilang gihulagway ang killers sa mayor nga paspas. Segundos lang, matod pa sa jail officer nga nagbantay kang Ramirez, ang pagsulod sa upat ka mga gunman, tulo niini ningrakrak sa kanhi mayor sud sa pansayan.
Ang kinatibuk-ang operasyon nilanat lang og 2-3 minutos. Bisan gani kon singko minutos lang, paspas na gani kini.
Kon basehan ang estorya sa mga hospital staff ug mga tawo nga didto atol sa hitabo, usa sa moabot sa huna-huna nga ang mao nga mga tawo trained kun gibansay. Di sila yano nga mga killers. Duna silay training nga susama og militar.
Gawas niini, klaro kaayong giplano ug posible pang gipraktis ang operasyon. Sa ingon niadto kapaspas ug kahanas, klaro kaayo nga ang operasyon giplano og maayo. Gipangkuha ang cell phones, gipang ibot ang linya sa mga landline nga telepuno ug gipangpostingan ang mga lugar sud ug gawas sa ospital aron way makalihok ug makasumbong sa kapulisan. KIni mga timailhan sa planadong operasyon.
Ang mga armas di usab yano. Gihulagway ang tag-as nga mga armas nga M4 Carbine, standard nga issue sa armadong kusog karon. Di yano ang makapalit ug makakupot kon sibilyan ang naghupot niini.
Taliwa niini, di kalikayan nga dunay mga tawo nga magduda nga mga awtoridad ra sab ang naghimo taliwa sa anti-drug campaign karon. Apan kining tanan mapapas lang kon dunay madakpan ug mataral nga killers ug mastermind sa pagpatay kang Ramirez.