INIG pormal nang molingkod si Mayor-elect Edgardo Labella posibling ma-usab na unya ang kamada sa konsiho sa dakbayan sa Sugbo. Sa pagkakaron, mayoriya pa gihapon ang mga sakop sa Bando Osmena Pundok Kauswagan (BOPK) hinungdan nga makapabout pa sila sa ilang baruganan ug madiktahan pa sa ilang amo nga pildero. Apan inig asumir na ni Labella ma-usab na ang dagan sa hangin ug mamahimo nang majority ang taga Barug-PDP Laban.
Sa pagkakaron, pito lang ang taga Barug ug 11 ang BOPK. Mao nang ma-isugon kaayo si Konsihal Bebs Andales nga mo-ingon nga inig-reorganized nila sa committees, dili nila hatagan og chairmanship ang taga Barug. Apan sa dili madugay ang taga Barug na ang manghawod diha. Kon mahinayon nga ma-deklarar nga null and void ang ilang certificates of candidacy ni Andales ug Alvin Arcilla, posibling makalingkod sila si Jerry Guardo ug Joel Garganera.
Ang Commission on Elections (Comelec) en banc midesisyon na nga dili kuwalipikado si Arcilla nga molansar pag-usab gumikan kay naka-serbisyo na og tulo ka termino. Wala makakuha si Arcilla og temporary restraining order (TRO) gikan sa Supreme Court maoy hinungdan nga final ang executory na ang desisyon sa Comelec en banc. So, out gyud si Arcilla samtang pending ang iyang apelasyon sa SC. Posibleng mosunod usab ang kaso ni Andales kay mao ra man ning nature nila.
Si Guardo mi-anunsiyo na sa iyang suporta ngadto sa Labella administration kay matod pa niya mosanong siya sa panawagan sa bag-ong mayor nga panaghi-usa. So, kon makalingkod na si Guardo adto na siya sa Barug. Unya si Joel Barug naman daan. Samtang si Konsihal Dave Tumulak misaad na usab nga motapon ngadto sa Barug inig lingkod nang Labella. Laing gipanglitawhan sa Barug mao sila si Konsihal Jun Gabuya ug Yayoy Alcoseba.
Posible pang daghang taga BOPK ang motapon sa Barug nunot usab sa anunsiyo ni Konsihal Margot Osmena nga dili na mag-apil-apil sa pulitika ang iyang bana. Ambot lang kon tinuod ba. Importante kaayo nga daghan ang mga kaalyado ni Labella sa konsiho aron masuportahan ang iyang mga legislative agenda. Dili magmalampuson ang iyang mga programa kon walay suporta sa konsiho. (bobbygnalzaro@gmail.com)