Mongaya: Plano alang sa Balili sa Naga

SI mayor-elect Val Chiong sa Syudad sa Naga nagplanong mo-coordinate kang Cebu governor-elect Gwen Garcia alang sa pagpalambo sa kanhi Balili beach resort ngadto sa usa ka malamboong economic ug business center.

Dugay na kini nga plano ni Mayor Chiong. Gani, tuyo unta niyang paliton sa Syudad sa Naga gikan sa lalawigan ang maong luna sa kantidad nga P300 milyones ubos kang Gob. Junjun Davide apan wala madayon.

Naangkon ang maong luna sa panahon ni Gob. Garcia ug sa taas nga panahon nahimong kontrobersyal. Apan sa ngadtongadto, naresolba ra ang mga kaso batok kang Garcia diha sa Court of Appeals.

Matod pa, ang maong luna kay duol ra man sa highway maingon nato nga prime lot ug naglantaw si Mayor Chiong nga mahimo kining makina alang sa kalamboan sa unang distrito ug sa lalawigan, di lang sa maong syudad.

Kon buot hunahunaon, ang Syudad sa Naga maoy maingon nato nga industrial center sa habagatang bahin sa Metro Cebu labi na nga naa dinhi ang duha ka dakong planta alang sa elektrisidad – ang karaang planta sa National Power Corp. (Napocor) ug ang Kepco-SPC power corporation – ug ang Apo Cement Plant.

“Business-friendly man ang Syudad sa Naga,” nagkanayon si Mayor Chiong. Tungod niini, daghan ang mga negusyong nadani sa maong syudad labi na diha sa plaza nga malambuon na kaayo.

Dayon, ang Primary Structures nagpadayag sab sa plano niini nga motukod og usa ka business process outsourcing hud alang sa information technology diha sa sentro sa syudad.

Apan dunay problema ang Naga. Gamay ra ang patag nga bahin sa syudad mao nga naglantaw si Mayor Chiong sa Balili property nga maayo kaayo nga dapit alang sa usa ka business ug economic center sa habagatan.

Gani, lakip sa plano sa mayor mao ang pag-reclaim pa sa dagat aron matukoran og pantalan ug lapad nga highway.

WPS

Tinuod, kinahanglang magkinto ang Pilipinas niining delikado nga kahimtang diha sa gitawag nato nga West Philippine Sea kun WPS.

Sa una, gitawag kini nato og China Sea. Apan, dihang atong gi-define ang atong teritoryo sa panahon nga kongresista pa si Tony Cuenco, gi-usab nato ang ngalan sa maong dagat nga West Philippine Sea.

Makaingon gani kita nga kining atong umaabot nga Konseho sa Syudad sa Sugbo dunay usa ka eksperto sa kahimtang diha sa West Philippine Sea nga mao si Konsehal Cuenco.

Bisan pa man, uyon ko nga di dayon mangitag away ang administrasyon ni Presidente Duterte sa China. Apan, di sab maayo nga mokalit kitag kabuotan manulti unya magsigi kitag pamalikas sa ubang nasud. Alang kanako, malain man ang China, apan molikay kini og gubat. Pwede kini atong paugatan.

(@anol_cebu sa Twitter)