TUNGOD sa kusog nga pagbunok sa uwan sa Metro Cebu ug uban pang parte sa lalawigan, niawas ang Mahiga creek, Dominggo sa hapon, Hunyo 23.
Hinungdan nga nakamugna kini og pagbaha sa kadalanan sa may habig sa Barangay Subangdaku sa Mandaue City ug sa Barangay Mabolo sa dakbayan sa Sugbo.
Nakita nga daghang mga basura ang nakabara diha na sa taytayan sa habig sa may Innodata.
Matud ni Jay Basubas ang Mandaue City Disaster Risk Reduction and Management officer nga na-monitor nila nga nagsugod pagtaas ang level sa tubig sa maong creek alas 3:50 sa hapon.
Hinungdan nga niawas kini ug nakabaha nga moabot sa hapit na tuhod sa tawo.
Dali nga nagpatabang ang MCDRRMO sa General Services Office ug sa clean and green sa Barangay Subangdaku aron mahinay-hinay sa pagkuha ang mga basura nga kasagaran mga plastik nga botilya ug uban pa.
Nihangyo usab sila sa mga sakop sa Traffic Enforcement Agency of Mandaue (TEAM) alang sa pagpa-detour sa ubang mga motorista nga posibleng matanggong.
Aduna sab mga government vehicle nga maoy mihatud sa mga stranded nga residente ngadto sa Mandaue City o sa silingang lungsod ug dakbayan sama sa Consolacion ug Lapu-lapu.
Ang Mahiga creek ang nahimutang sa boundary sa dakbayan sa Mandaue ug dakbayan sa Sugbo, ug lahus kini ngadto sa kadagatan sa may North Recalamation Area.
Usa sa nakita usab nila nga nakatampo sa taas nga tubig sa Mahiga creek mao ang taas usab nga level sa dagat kon taob.
Matud ni Basubas nga ila ng nabantayan nga kon moulan sa habig lang sa dakbayan sa Mandaue, dili ra moawas ang maong creek, apan moawas kini kon parehong makasinati og ulan ang dakbayan sa Mandaue ug dakbayan sa Sugbo.
“Atong na-monitor nga nsiaka ang tubig, ang kining sa Innodata, nagpadala nata og mga personnel to assist sa inkaso sa traffic, sa mga stranded, nagpadala sab ta og personnel sa DRRMO to monitor sa area. Kana gud diha sa Innodata (Mahiga creek) kung sa ato lang gyud mag-ulan-ulan, dili ran a siya kasaka, but if naay uwan sa bukid sa Cebu City side, naa gyud chances nga mosaka gyud ang tubig,” pagpasabot ni Basubas sa Superbalita Cebu.
Dugang ni Basubas nga dali usab sila nga nakig-alayon sa Cebu City Disaster Risk Reducation and Management Office, pinaagi ni Harold Alcontin, aron usab sa paghimo sa ilang mga aksyon, ilabi na ang pagpakuha sa mga nakabara nga basura.
Sa gihimo nga dugang monitoring sa MCDRRMO, wala ra niawas ang ubang sapa sa habig sa dakbayan sa Mandaue hangtud sa alas 5 sa hapon, gani wala ra miabot sa kritikal level ang mga kasapaan.
Wala ra sab gibaha ang mga lugar nga kanunay bahaon sama sa dalan A.S. Fortuna, Tipolo, ug Barangay Paknaan.