DUNAY mga bilihong mga butang nga gigasa kanato gikan sa kahitas-an sa atong labaw’ng magbubuhat, gikan sa mga gagmay nga mga butang hangtud sa mga dagko nga sarang magamit sa mga tawo.
Tanang mga butang nga ania ning kalibutan gihatag sa Diyos aron atong kapahimuslan, apan gi-abusohan sa katawhan, sama sa bahandi nga nagagikan sa bulawan apan pipila lang ang makapahimulos niini.
Usa ka gasa sa Diyos nga walay pagpihig ug walay gipili nga gamiton kini gikan sa pinakaadunahan hangtud sa pinakamakililimus nga tawo sa tibuok kalibutan, unsa kini? Kini mao ang tubig.
Ang tubig walay katiguriya nga adunay mahal kay pinakahinlo kini nga tubig ug ang maka-inum niini kadto lamang mga adunahan, ang tubig, para gyud sa tanan ug kon mahimo himuon kining priority sa atong kagamhanan.
Nagka krisis na usab sa tubig ang Metro Manila karon. Karong bag-o nagpagula ang National Water Regulatory Board ug Red Alert nga adunay krisis sa tubig tibuok Metro Manila nga kon dili kini mapangadaman pag-abot unya sa makalilisang nga hulaw, wala na sila’y tubig nga ma-inum.
Plano sa administrasyong Duterte tukoran ug mga Dam ang mga suba, aron makatigum og tubig, pangandam sa umaabot nga krisis, apan, ang problema sagulan mangud og politika?
Lakip na ang makakomonistang utok kay lagi kuno manghulam napud ta og kwarta sa China, naa pa’y ilang pagpanghadlok nga basig mapareha kuno kita sa Sri Lanka nga biktima daw Dept Trap sa China.
Wa tingali mag-research kining mga tawhana, nganong itandi man ta nila sa Sri Lanka nga ang ilang dollar reserve kulang kulang $10.000, samtang kita sa Pilipinas $78-bilyon ang atong dollar reserve?
Nagkagidlay ang ekonomiya sa Sri Lanka, gilikayan sila sa mga foreign investor, samtang kita gidugukan sa mga langyaw’ng mga magpapatigayon.
Balik ta sa krisis sa tubig, ang dakbayan sa Davao sa mga nanglabay nga dekada nag-agad sa tubig gikan sa kinahiladman sa yuta. Ang tawag niining mao ang tinubdan, mao ang AQUAFER.
Ang Davao City Water District (DCWD) ubos sa paggiya ni kanhi Mayor Rodrigo Duterte, naghimo og lakang nga mangita og laing tinubdan sa tubig aron kon magkina-unsa dili kita mawad-an og supply sa tubig agi'g pagpangandam sa sunod ta nga henerasyon.
Nakig-partner karon ang DCWD ug APO AGUA Infrastructura aron kapahimuslan ang tubig gikan sa Tamugan ug Panigan River. Karon sugdan ang pagmontar sa gamay nga dam ug water treatment, laboratory facilities ug mga reservoir.
Bilyones ang kantidad sa maong proyekto, apan makasiguro kitang taga Davao nga walay krisis nga mahitabo susama sa Metro Manila ug Cebu. Labaw sa tanan, makapahulay ang atong mga aquifers sa pagpaningkamot sa atong Mayor Sara Duterte-Carpio.