ANG Commission on Elections (Comelec) pormal na nga nagpahibalo ngadto sa publiko lakip ang voters registration alang sa Sangguniang Kabataan (SK) ug barangay elections karong tuig 2020.
Agosto 1 hangtud Septembre 30 ning tuiga mao ang panahon nga gikatakda diin abli ang buhatan sa Comelec sa mga buot magpatala og sayo.
"Ang atong registration will include Saturdays and holidays so amoang gihangyo ang mga wala ma-rehistro nga i-grab ang opportunity kay aron sila makaboto kon dili ma-postpone ang SK ug barangay elections next year," asoy ni Atty. Jennifer Ancla, provincial election officer sa Davao del Sur.
Sa bisan asa nga dapit ning rehiyon abli ang mga buhatan sa Comelec ug ang ilang pagpahigayon og mga satellite offices sa mga barangay aron maka-rehistro ang katawhan.
Di na sab angay mabalaka ang mga SK voters ning mga panahona gumikan gihan-ay na sa Comelec ang ilang mga pangalan.
"Sangguniang Kabataan voters need not register anew upon turning 18 their names will automatically be transferred, from the SK List of Voters to the regular List of Voters."
Hugot kaayo karon ang paningkamot sa Comelec nga maplastar na kining daan og sayo aron wala unya'y ikamahay ang mga botante nga di sila kabotar.
Gitataw sa Comelec nga angayang di na huwaton ang katapusang adlaw sa pag-rehistro sanglit taas na ang lugway nga duha ka bulan.
Alang sa mga botante, kinahanglan ning sayo pa magpa-rehistro na, dili na hulaton ang rush-hour aron sab dili kaayo ipit sa Comelec.
Patala na, pahimusli ang katungod nga gigarantiya sa balaud diha sa kagawasan sa pagboto.