DAVAO DEL SUR -- Plantsado na sa probinsyang kagahamhanan ang tanang aktibidad alang sa pagsaulog sa ika-52 nga Araw ng Davao del Sur diin abrihan sa Hunyo 28 ug motak-op sa adlaw sa kulminasyon sa Hulyo 1.
Alang sa kasaulogan, gihimo ang duha ka adlaw nga football tournament nga nahuman kagahapo, adlawa nga Dominggo, samtang sa Hunyo 26, ipahigayon ang Dugso Sandawa Festival sa Indigenous People's Day.
Sa umaabot nga Miyerkules, Hunyo 27, alas syete sa buntag ipahigayon ang usa ka adlaw nga job fair ug pagasugdan kini sa upat ka adlaw nga 1st Davao del Sur cyber games nga motak-op sa Hunyo 30.
Sa Hunyo 28, himuon ang flag banner raising ug pagasundan sa Trade and Expo Cum Investment and Promotion.
Apil sab sa aktibidad sa kasaulogan mao ang basketball game sa mga lalaki ug mga binabaye diin ipahigayon sa buntag ug aduna’y national open dart competition ug tug of war batok sa kapolisan ug militar sa hapon.
Pagahimuon sab sa alas sais sa gabii ang “Dangal ng Davao del Sur and Awards Socio-Cultural Nights” sud sa sports coliseum.
Sa Hunyo 29, Huwebes, ipahigayon ang final game sa football tournament, invitational women’s volleyball tournament, ug sugdan ang duha ka adlaw nga 3rd Davao del Sur 4X4 extreme and production class off-road challenge ug dog show sa tanang matang sa iro.
Sa Hunyo 30, mao ang oath-taking sa mga bag-o ug nagpasubling opisyal sa provincial capitol ug ang rhythmic dance competition sa sports coliseum diin mahitabo sab ang marching band competition.
Sa adlaw sa kulminasyon, usa ka misa ang ipahigayon sa Mary Mediatrix Cathedral sa alas sais sa buntag ug pagasundan sa motorcade ug float parade contest.
Pagahimuon sab sa alas noybe sa buntag ang culmination program ug sa pagka-hapon ipahigayon ang kick/Amateur boxing sa Rizal Park sa Digos City ug sa pagka-gabii mao ang libreng konsyerto ug fireworks display sa sports complex oval.
Giwagtang na sa probinsyang kagamhanan ang Mutya ng Davao del Sur sa way matinong rason diin miani kini og mga pagsaway sa mga netizens sa social media sa miaging tuig.