COTABATO CITY -- Gipangdakop ang lima ka tawo nga nalambigit sa pagpayuhot sa ginadiling drugas alas 5:20 sa hapon niadtong Sabado ning dakbayan.
Giila ang mga suspek nga sila si Jeremy Vistajo, 29-anyos, Mahdie Saglayan 54-anyos, Abdulmanan Laguiab Ali, Amid Malangka Kudanding ug Mohaliden Ulama Baguilan.
Gikataho sa Cotabato City Police Office nga gironda sa mga awtoridad ang usa ka balay nga salag sa mga adik-adik sa Tanghal Subdivision, Barangay Bagua 2 sa siyudad sa Cotabato.
Wala na makaipsot ang mga suspek nga gipalibutan sa hiniusang puwersa Cotabato City Police, Philippine Drug Enforement Agency- Bangsamoro Autonomous Region in Muslim Mindanao, 5th Special Forces Battalion ug Ronda Team nga gipangulohan ni Mayor Cynthia Guiani Sayadi.
Narekober sa mga suspek ang 11 ka mga pakete sa gituohang shabu, upat ka cellphones, usa ka kalibre sa 45 nga pistola, mga bala ug mga drug paraphernalia.
Ang balay nga gironda sa mga awtoridad gihimo nga drug den kun diin didto maga pot-session ang mopalit og shabu.
Gisang-at na batok sa mga suspek ang kaso nga kalapasan sa Republic Act 9165 kon Comprehensive Dangerous Drugs Act of 2002.