MAMBAJAO, Camiguin Island -- Patay ang tulo ka mga call center employees sa Davao City atol sa disgrasya sa Sitio Quipasa, Poblacion, Mambajao, alas 4:45 sa hapon niadtong Sabado.
Usa ka pahasubo ang gipaambit sa IBEX Global Philippines-Davao sa pagpanaw sa tulo nila ka dabawenyong empleyado nga namatay atol sa ilang team-building activity.
Giila ang ang tulo ka mga namatay nga sila Julie Ann Mae Oliva, Jovert de Asis, ug Ian Jumahalili nga anaa sa admin sa IBEX-Davao nga nahimutang sa SM Lanang Premier.
Ang mga naangol nga anaa sa Mambajao District Hospital giila nga sila Eric Opao, 38-anyos; Jeffrey Golingay, 33; Ernesto Ong, 24, operahanan, Rose Ann Balaba, kinsa naa sa Intensive Care Unit, Jeffry Dismas; manager sa IBEX call center, ug si Peter Anthony Cantila, 26-anyos.
Gipang-ila sab ang ilang mga kauban nga sila Glyn Ann Sabacan, 34; Jenny Vic Morensillo, 21; Joy A Sobresina, 48, taga Sultan Kudarat, ang driver sa Hi Ace Van nga gipanag-iyahan sa Davao Cavaliers Security Agency nga naka-base sa Cagayan de Oro City; Rustom Porosuelo, 29, taga Gen. Santos City; ug usa ka Miko Golingay, 4-anyos, taga Davao City.
Gibutyag ni Mambajao Municipal Police Station Chief of Police, Captain Arnold Gaabucayan nga nawad-an og brake ang gisakyan nila nga van hinungdan nga misimang kini ug nadaro sa kalubihan.
"Mga 800-meters na ilang dagan nahibal-an na sa drayber nga nawad-an na sila og brake. Ang iyang plano, ipahulog nalang niya ang ligid sa kanal kilid sa dalan aron didto lang sila madaro og hinay-hinay, pero wala na niya makaya, og didto sila nalahos sa ubos nga bahin sa kalubinhan," ingon ni Police Capt. Gaabucayan nga nahinabi sa SuperBalita Davao pinaagi sa telepono, kagahapon.
Ang grupo giingong mobisita sa White Island apan nahaponan na sila ug milahos nalang sa Saay Cold Spring sa Barangay Poblacion.
Matud sa opisyal nga siyam kanila pulos empleyado sa IBEX Global Philippines-Davao diin ang upat mga kabanay sa empleyado.
"Mianhe na sa station ang manager sa Davao Cavaliers Security Agency nga Cagayan de Oro based, kay ilaha man ang Hi Ace Van ang gigamit sa mga biktima," dugang sa opisyal.
Sa kasamtangan, ang mga biktima nagpabiling nagpatambal sa Mambajao District Hospital diin ang drayber temporaryo nga gikustodiya sa kapulisan samtang nagpadayon ang ilang gihimong imbestigasyon sa aksidente.