NAGHINAMHINAM na si Kiefer Ravena sa iyang pagbalik og duwa gikan sa 18 ka mga buwan nga suspensyon nga gipahamtang sa FIBA ngadto kaniya.
“I’m very excited. Kung iisipin mo, 500 na araw ko itong hinintay to play the sport you love. I’ve been working out by myself pero iba pa rin na kasama mo ang teammates and coaches and I’ll be able to play with the team,” matod ni Ravena sa interbyu sa Spin.ph.
Sugod karong adlawa, gitugtan na si Ravena nga makaapil og balik sa praktis sa iyang mother team sa Philippine Basketball Association (PBA) nga mao ang NLEX Road ug sa Gilas Pilipinas.
Hinuon dili pa siya puwedeng makaduwa og torneyo hangtod sa pagkapupos sa iyang suspensyon karong Agusto 24.
Gikinahanglan si Ravena sa Gilas Pilipinas hilabi na nga nipadayag na ang No.1 pointguard sa Asya nga si Jayson Castro nga dili na moduwa alang sa national team ning higayuna gumikan sa personal nga rason.
“News has been going around na walang masyado nagpa-practice sa team. Kilala niyo naman ako na kung pwede na talaga, di ako magda-dalawang isip na maglaro para sa country,” matod ni Ravena.
Ang Gilas Pilipinas nagsugod na sa ilang preparasyon alang sa ilang kampanya sa FIBA World Cup nga sugdan karong Agusto 31 sa China.
Daan nang nag-ingon si national coach Yeng Guiao nga iyang gilakip si Ravena sa iyang line-up bisan padayon pa kining nagserbisyo sa iyang suspensyon.
Apan adunay kabalaka si Guiao kabahin sa kondisyon sa two-time UAAP MVP.
Hinuon giklaro ni Ravena nga wala siya nagpasagad sa iyang kaugalingon ug gipasalig niining anaa siya sa saktong kondisyon.
“I think I’ll surprise a lot of people with my game shape and my conditioning right now,” pasabot ni Ravena.
“Honestly, last time I felt this was in third year college. I’ve lost a lot of weight, 22 pounds to be exact, and playing-wise, I think maraming magugulat kasi gusto ko talaga magulat ang mga ibang tao na hindi naniniwala na makakabalik ako sa dati.”
Si Ravena napahamtangan og suspensyon human masuta sa FIBA nga aduna’y performance enhancing drugs nga nagkatay sa iyang kaugatan.
Gipasabot ni Ravena nga wala siya’y gitumar nga gidili ug posibleng nakuha niya kini sa iyang giinom pre-workout drink nga “DUST.” (ESL)