PATAY ang usa ka asawa human nalatayan og trak dihang aksidenteng naligid ang motorsiklo nga gimaneho sa bana niini diha sa national highway sa Barangay Lapinig, lungsod sa Balingoan, Misamis Oriental.
Giilang asawa nga mao si Regee Saraos, 33, minyo, lumad nga taga Brgy. Macabalan ning siyudad.
Sa report sa Balingoan Police Station nasuta nahitabo ang insidente mga alas 8:15 sa gabii kon asa usa gikalambigitan sa usa ka motorsiklo gimaneho ni Ardee Saraos, 35 sakay ang asawa niini nga si Regee.
Padulong kining motorsiklo sa siyudad sa Cagayan de Oro ug tupad sab niini ang usa ka prime mover truck nga gimaneho sab ni Marvin Seith Suan, 38, lumad nga taga Tubos Lanao del Norte.
Apan paghidangat sa tulay nga bahin sa maong dapit wala nabantayan sa motorsiklo ang hump gumikan sa gitrabaho nga dalan hinungdan nga naligid ang motorsiklo. Tayming sab nga nagbrake ang prime mover nga trak tungod gihapon sa hump miresulta nga nadidto sa dalan sa prime mover nilagpot ang angkas nga si Regee.
Maoy hinungdan nalatayan ang biktima ug grabeng kadaot sa lawas ang naangkon.
Gisuwayan pa og dala sa Misamis Oriental Provincial Hospital sa lungsod sa Talisayan ang biktima apan dead on arrival nga gideklarar sa doktor.
Ang driver sa prime mover detinado karong panahona sa Balingoan Police Station ug gisuta pa kung aduna bay mahitabong settlement tali sa duha.