HUMAN sa mainitong panagtagbo sa komitiba sa Public Utilities nadesisyonan nga ibalik una sa operasiyon ang mga motorsikad ug tricab gikan sa Barangay Bugo ug Agusan paingon sa Barangay Puerto nga moagi sa national highway.
Nasayran nga nagpahigayon og panagtagbo aron nga mahisgutang ang nagkatensyon tali sa mga residente ilabi na sa mga drayber sa maong mga Barangay human nga gipangharangan ang mga motorized sikad ug tricab diha sa utlanan sa Bugo sa silanganang bahin sa national highway sa siyudad.
Atol sa gipahigayong panagtagbo niadtong Hunyo 21 sa buhatan sa bise mayor nagtinubagay sila si Kapitan Vic Talingting sa Barangay Bugo ug Kapitan Rustico Ian Achas sa Barangay Puerto.
Human sa panagtagbo na desisyonan nga ibalik una sa normal ug walay pagpangbara sa mga motorsikad ug tricab diha sa kadalanan ilabi na nga ang nakagubot mao kini ang pagpasulod lamang sa dunay mga sticker.
“Ato lang sa nang i-set aside kanang sticker-sticker pangitaan sa nato og solusyon, walay movement,wala’y pagbara balik sa normal nga pamaagi hangtod ma-study-han sa RTA together with our city police traffic enforcers,” matud ni Lao.
Kahinumdoman nga nagreklamo ang mga sumasakay gumikan na usab kay ipakanaog kini ug magbaklay pa og pila ka mga metros ilalom sa kainit sa panahon tungod kay dili ipasulod ang mga motorized sikad ug tricab nga walay mga stiker sa oras sa alas 3:00 hangtod alas 6:00 sa hapon.
Giingong girespetohan niini ang bala-od sa Barangay Puerto apan dili na niini makaya ang mga yangungo sa mga residente ug nahiubos kini tungod kay ang stiker nagdala kini og logo sa Barangay Bugo.
“Wala man pud mi nagsabot ni Kapitan Achas nga ibutang niya sa sticker nga ilang gibaligya kung gibaligya man?,” matud ni Talingting.Nganong naay Bugo bantog ra nga pagkulata sa ako facebook sa mga tawo apil daw ko sa bahin tunga daw mi ni Kapitan Achas sa halin sa stiker,” dugang niini.
Giingong gibaligya ang anaa sa 150 ka mga stiker lamang sa kantidad nga P350.00 matag stiker ug gani wala kini resibo nga ihatag.
Samtang depensa usab ni Achas nga dili kini bag-o ug dugay na kini nga gi-implementar gumikan kay sa grabe nga pagkabukog sa dagan sa trapiko ug nasobraan lang.
“We are implementing that for many years, it so happens nga naay exaggeration, makita nato sa media, makita nato nga sobra mao na lugar na ang outcome ani nga istorya, everyday namo na gipatuman sa among Barangay in assistance sa pagcontrol sa traffic,” matud ni Achas.
Gidugang pa niini nga dunay mga negosyante ang nalugi giingong tungod kay ang mga kliyente nagreklamo gumikan kay nakaparada na ang mga motorboat sa mga patigayon.
Makigtagbo usab pagbalik ang mga hingtungdan nga apektadong sektor sunod semana kauban na ang tinugyanan Roads and Traffic Administration (RTA), kapulisan ug uban pa aron nga hingpit na nga masulbad ang maong problema tali sa maong mga Barangay.
Buot usab nga istudyohan pag-ayo ang sitwasiyon ilabi na ang pagbutang og laing dalan aron nga dili na moagi sa national highway gumikan na usab kay ginadili man gyud ang pag-agi sa mga tricab ug motorized sikad diha sa national highway.