HUMAN sa taod-taod nga panahon nga gihatag aron ihunong ang pagpatukod sa panimalay sa usa ka retiradong pulis hingpit na kining giguba niadtong Hunyo 22 sa Barangay Canitoan ning siyudad sa Cagayan de Oro.
Ang maong balay gipanag-iyahan sa giingong retiradong pulis diin gikabutyag sa city legal office nga nakarehistro kini sa siyudad ug relokasiyon alang sa mga retiradong pulis ug kasundalohan apan wala pa kini masugdan ug gikabalaka nga kung dili kini mahunong mas dako hinuon ang problema ilabi na kung daghan pa ang mosundog sa pagpatukod.
Sa pakighinabi kang Antonio Resma Jr., sa City Legal Office sa siyudad nga kanunay na kini gihatagan og notice aron nga ihunong na ang pagpatukod ug boluntaryong gubaon ang nasugdan apan nagmagahi kini hinungdan nga gi-implementar ang bala-od.
“Sa kapila nga higayon gi hatagan siya og chance mo undang sa construction sa balay ug voluntarily i-demolish but nagpabilin ug magahi siya ug nagpa dayon. Busa walay lain option but i-complete ang process mao to ang last is Demolition Order, ni tabang gyud dayon ang City sa pag implement gahapon,” matud ni Resma.
Nipalag usab ang tag-iya niini ug nangayo og court order apan giingong dili na kini kihanglan tungod na usab kay ubos sa ordinansa sa siyudad dunay gahom ang Barangay sa pagguba sa mga ilegal nga pagpatukod.
Nasayran nga bisan unsa nga permit walay gihuptan ang maong tag-iya aron sa pagpatukod sa maong panimalay.
Base na usab sa City ordinance no. 9528-2005 diin naghatag og gahom sa barangay diin dunay katungod sa pagguba sa mga balay, poste, istruktora, gambalay ug uban pa nga itukod nga ilegal hinungdan nga gipatuman ang demolisyon.
Hinay-hinay usab og guba ang mga parte sa maong panimalay aron usab nga magamit pa ang mga materyales.