USA pa ka dakong tanghaga kon asa mahiluna ang upat ka All-Star starters nga sila si Kawhi Leonard, Kevin Durant, Kyrie Irving ug Kemba Walker inig sugod sa free agency sa National Basketball Association (NBA) karong Hunyo 30.
Gawas sa nangahisgutan, puwede sab mabira gikan sa free agency ang All-Star reserves nga sila si Khris Middleton, Nikola Vucevic ug Klay Thompson.
Dili pa lang dugay, ang laing All-Star nga si Anthony Davis nakahimo og langas dihang nabalhin siya gikan sa New Orleans Pelicans ngadto sa Los Angeles Lakers diin iyang ikauban ang four-time MVP LeBron James.
Apan labing seguro, mas grabe langas ang mahitabo inig abot sa free agency hilabi na kon adunay All-Stars nga mabalhin og laing puwersa.
Sa kinatibuk-an, kapin sa 200 ka mga maagduduwa ang free agents. Ang magamit pa nga salary cap sa liga milapas na og $500.
Kon idugang ang kantidad sa suweldo sa mga magduduwa sa free agency inig sugod og pinarmahay karong Hulyo 6, gibanabanang moabot og $2 billion ang kinatibuk-ang suweldo sa mga magduduwa sa NBA sa magsunod upat ka mga tuig.
“I feel like I’m going to need every dollar,” matod ni Philadelphia 76ers general manager Elton Brand.
Ang Brooklyn Nets ug New York knicks mao ang aduna’y labing dakong espasyo sa ilang salary cap diin moabot og tag $100 million ang puwede nilang magamit sa paghaylo og dekalidad nga mga magduduwa.
Nagpasabot kini nga ang duha ka mga kampo adunay kapasidad sa pagtanyag og maximum salary sa duha ka mga magduduwa. Sila si Leonard, Durant, Walker ug Irving pulos naa listahan sa mga magduduwa nga mahimong tanyagan og maxiumum salary.
“I don’t know what they’re going to be interested in, but when they look at Brooklyn from afar we’ve got to give them some credit because the guys that are free agents, all of them have spent the last year or two surveying the league,” asoy ni Brooklyn Nets general manager Sean Marks.
“They know where they want to go and what they want to be a part of.”
Si Walker puwedeng mangayo sa iyang team Charlotte Hornets og $221 million nga kontrata aron magpabilin. Hinuon daan na siyang miingon nga puwede siyang modawat og gamay kon kinahanglanon.
Si Durant puwede sab mangayo og samang kantidad ngadto sa Golden State Warriors unya wala kini miingon nga andam siyang modawat og mas ubos nga suweldo.
Wala pa sab klaro kon unsa’y plano ni Irving apan ang labing tanghaga mao ang kabahin ni Leonard, kinsa maoy nangulo sa Toronto Raptors aron maangkon ang labing unang titulo niini sa NBA. (AP, ESL)