SUPERBALITA CEBU

Turismo Palambuon

SA PAGKAMALAMBUON sa turismo sa habagatang Sugbo, hingusgan sa Department of Tourism sa Central Visayas nga mokatap usab ang tourism economic activities sa amihanang bahin sa lalawigan.

Nakita ni Shahlimar Tamano, regional director sa DOT 7, nga daghan na kaayo og mga turista sa habagatang bahin sa probinsya gikan sa dakbayan sa Carcar padung sa lungsod sa Oslob tuyok sa lungsod sa Ginatilan hangtod sa kasadpang bahin sa lungsod sa Aloguinsan.

Matod niya, ang tanang 53 ka mga siyudad ug mga lungsod sa Sugbo kay dunay mga nindot nga kadagatan, kabukiran ug falls nga wala mahibaw-i sa mga turista.

Ang Carcar nabantog sa art ug cultural tourism apil usab mga produkto sama sa ampao, chicharon, bukarilyo, local nga mga sapatos, tsinelas ug uban pa. Samtang ang Oslob nabantog sa whale shark watching, falls, nindot nga kadagatan ug karong bag-o monkey watching. Sa falls usab naila ang Ginatilan samtang ang Bojo River sa Aloguinsan.

Sumala ni Tamano nga usa sa mga prayoridad ni Tourism Secretary Bernadette Romulo-Puyat nga hingusgan ang pag-promote sa turismo sa northern Cebu sama sa Cebu Safari and Adventure Park sa lungsod sa Carmen, nindot nga kadagatan sa isla sa Malapascua, sa lungsod sa Daanbantayan; lungsod sa Sta. Fe sa isla sa Bantayan; ug mga lungsod sa San Remigio ug Medellin.

Niadtong Sabado, Hunyo 22, giinspeksyon ni Benito Bengzon Jr., undersecretary sa tourism development planning sa DOT ang Cebu Safari sa Carmen.

Sigon ni Tamano gusto ni Puyat nga sustainable ang mga produkto sa kalungsuran ug mga siyudad. Mapugngan ang pagkatap sa daghang mga basura ug mapanalipdan ang kinaiyahan.

“Kita, we think the product is here already. Gamay na lang kulang but we need more marketing,” dason sa regional director.

Siya nidugang ang gikinahanglan sa pagkakaron nga mapalambo ang transportasyon agi sa kadagatan gikan sa Metro Cebu padung sa mga lungsod sa amihanang Sugbo.

“What we need is faster and more efficient intra Cebu transportation, like from Lapu-Lapu to Sta. Fe, Bantayan. How do you arrive in Carmen as much as possible? If we can cut it in two hours,” pamulong ni Tamano.

Ang DOT nisugyot og paspas nga water vessels ug dugang mga pantalan nga tukoron.

Ang pagpalambo sa sea transportation ang apil sa padayong gihimo nga master plan sa DOT uban sa National Economic and Development Authority ug Tourism Infrastructure and Enterprise Zone Authority.

Sa plano, i-identify usab kon unsa nga mga dapit ang nagtanyag og adventure, sports, faith ug culture tourisms; pagpalig-on sa marketing ug maritime infrastructure; power supply; communication facilities, carrying capacity sa tourist destinations, ug uban pa.

“We’ll make sure the designs of the resorts, mga facilities will blend with environment. Dili siya murag eyesore,” dugang ni Tamano.

Ang paghimo sa 10 ka tuig nga master plan gikan sa 2020 hangtod sa 2030 kay giaprobahan ug giduso sa Regional Development Council (RDC) 7 atol sa ikaduhang tigom niadtong Hunyo 21 didto sa San Juan, Siquijor.

Sigon ni Tamano manginahanglan sila og P50 milyones hangtod sa P100 milyones nga funding sa paghimo sa master plan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph