Mga abusadong traffic enforcer taktakon: Villaver

MGA badlungon ug ligoy nga mga sakop sa City of Talisay-Traffic Operation Development Authority (CT-TODA) taktakon sa paglingkod unya ni Mayor-elect Gerald Anthony "Samsam" Gullas Jr. sa pwesto.

Apan kadtong magpabilin ug kadtong bag-ong makuha nga mga traffic enforcer hatagan og insakto nga benepisyo aron taas ang ilang moral.

Kini ang gipahibawo ni Rogelio Villaver, pangulo sa CT-TODA.

Si Gullas daan nang nipahibawo nga usa sa iyang mga prayoridad mao ang paghatag og kahapsay sa dagan sa trapiko sa dakbayan.

Matod ni Villaver nga adunay dakong kausaban unya sa ilang buhatan ilabi na sa pagbansay sa mga enforcer ug ang ilang batasan diha sa karsada.

Iyang nabantayan nga adunay mga tarong ingon man badlungon nga iyang mga sakop.

Iyang giangkon nga adunay nagpabadlong nga mga traffic enforcer, sama sa usa ka taho nga dunay mga pagpangwarta ngadto sa ilang mga dinakpan.

Mao kini hinungdan nga usa unya kini sa ilang tan-awon kon si kinsa ang ilang angay nga taktakon ug ipabilin sa puwesto sa bag-ong sa administrasyon ni Gullas sa dakbayan.

Nasayran nga usa sa ilang plano nga himuong casual nga kawani ang traffic enforcers sa City Hall ug kinahanglan nga kadtong mga kuwalipikado lang ang madawat sa maong benepsisyo. (DRT)