USA ka low pressure area (LPA) ang nakasulod na sa Philippine Area of Responsibility (PAR) sa alas 7:00 sa gabii niadtong Sabado, Hunyo 22.
Hinuon, sa monitoring sa Philippine Atmospheric Geophysical and Astronomical Services Administration (PAGASA), niubos ang kahigayunan nga mahimo kini nga ikaupat nga bagyo nga makasulod sa nasod ning tuiga nga panganlan og 'Dodong.'
Gipasabot ni Engr. Al Quiblat, hepe sa Pagasa-Visayas, nga 50-50 na lang ang tsansa tungod sa presensya sa wind shear kun mga hangin nga gikan sa nagkadaiya nga direksiyon nga nihuros nga maoy niguba sa panagtapok o circulation sa LPA.
Dili makaporma si 'Dodong' bisan pa man paborabling ang kainiton diha dapit sa kadagatan sa pag-umol sa bagyo.
Atol sa ala 1:00 sa hapon nga weather update, anaa ang LPA sa 800 kilometro East Northeast sa Guian Eastern Samar, diin ang pinisik niini ang hinungdan sa pag-uwan sa Eastern Visayas ug Eastern Mindanao.
Gilantawan nga dili gyud kini makahimo sa pag-landfall kay mobaybay lang kini sa kadagatan sa silangang’ parte sa nasod.
Ang nasinati nga mga pag-ulan sa Sugbo sa Dominggo sa hapon, Hunyo 23, matod ni Quiblat, tungod sa localized thunderstorm, nga mas kusog pa nga pag-ulan.
Ang localized thunderstorm ang nagdala pa og mga pagpangilat ug pagpanugdog ang masinati sa mosunod nga mga adlaw. (FMD)