NAGSAKAY ko og dyip nga nagruta og Labangon-SM City buntag sa niaging semana. Tungod kay oras sa tingkay namuwak sa daghang pasahero nga naglakip sa mga senior citizen ug batan-on. Pag-abot sa eskina Colon ug Leon Kilat St. nanaug ang pipila sa mga pasahero og nipuli og sakay ang usa ka babaye nga mabdos. Niirog ko pabor sa driver sa pagtuo nga mao sab ang buhaton sa uban aron mahimong sayon alang sa mabdos paglingkod. Pero wa ni mahitabo.
Ang ubang pasahero nag-iyahay hinuon og irog padung sa pultahan. Luoya sa mabdos. Naglisod intawon pagpangita og kalingkuran. Wa ko kasabot sa akong gibati. Wa ko kapugong pagpabuhagay sa akong sentemento. Nitimang ang diha sa akong tapad nga nailhan nako sa pangalan nga si Zee Garces taga Tres de Abril. Parehas mi nga niirog padung sa likod sa driver pagsakay sa mabdos nga nailhan nako nga si Sarah Bulambao taga Basak San Nicolas.
Matod ni Zee ang nahitabo ni Sarah kanunay gyud niyang masaksihan matag sakay niya og dyip. Sama nako wa siya makauyon sa taras sa ubang pasahero nga di makamaong maghunahuna sa sitwasyon sa uban.
Si Sarah nipadayag sa iyang kahigwaos. Matod niya di sayon ang iyang kahimtang labi na karon nga lima na ka buwan ang iyang tiyan. Unta to pagtikang pa lang niya sa hagdanan sa dyip sama sa gibuhat namo ni Zee hawanan dayon ang ang lingkoran duol sa pultahan. Unsaon nag-iyahay man og sibog ang mga pasahero padung sa pultahan. Naluya intawon ang mabdos og duko duko sa bakanting lingkoranan. Di gyud sayon kay nag-aginod na baya ang dyip. Makapangutana kita gawas sa mga pasaherong wa magpakabana duna pa bay laing mabasol? Di man ta experto sa lagda sa panakayan,sa akong pagtoo kargo ni sa driver paghimong sayon alang sa iyang mga pasahero nga mosakay sa iyang dyip.
Ang driver modemanda sa iyang mga pasahero pagbakante sa mga lingkoranan duol sa pultahan sa matag higayon nga dunay mopara. Maayo ra untag ang mabdos ray mopara. Naa pay daghan nga mga senior citizen, mga inahan nga ngkugos sa ilang masusu, ug mga pasahero nga nagsakwat sa ilang mga butang ingon man kinumpra. Mangutana ta sa taga LTO ug LTFRB kong naapil ba ni sa ilang monitoring pagsilot sa mga driver nga ang gihunahuna mao ra ang ilang kita hinikalimtan ang bug-at nilang responsabilidad sa ilang mga pasahero. Naa pay kalaki aning mga konduktor. Bisan puno na magsige og masiyar nga kulang pa og lima.
Hisgutan na nato ni kaniadto mao nga nisugyot ta nga natag dyip may ipapilit nga sipra kong pila ra ka pasahero ang gitugot nga ilang makarga. Ang sipra anha ipapilit atubangan sa mga pasahero.
Balik ta sa kaso ni Sarah manghinaot ta nga ang taga LTO ug LTFRB motutuk niini. Di ba naa may abiso nga ibakante ang atubangang lingkoranan kong may PWD nga mosakay? Unta iapil nila ang mga mabdos og senior citizen. Kay lisod kanunay ang sakay bahala og dili front seat.