NAKAUBAN ako sa pagdala sa patay’ng lawas ni Kongresista Mariano “Nonoy” Piamonte ngadto sa iyang lubnganan sa Barangay Paligue, Padada, Davao del Sur niadtong Dominggo, Hunyo 23 sa buntag.
Napuno ang simbahan sa parokya sa San Miguel Arkanghel sa iyang mga paryente, higala ug kauban sa ilang party-list nga A Teachers.
Molingkod unta si Nonoy isip sakop sa ika-18 nga kongreso sa Pilipinas karong Hulyo 1 apan naapsan siya sa iyang gihambin nga balatian busa namatay siya pipila ka adlaw human siya gidala sa hospital sa Davao City.
Daghan ang nasayangan sa iyang pagpanaw kay ika-4 na unta kini niya nga termino isip representante sa mga magtutudlo diin ubay-ubay nga balaod ug balaodnon nga nagpalambo sa edukasyon ang iyang gipanday.
Upat ka pari ang nikonselebrar sa “Requiem Mass”: ang kura paroko sa St. Michael Parish, ang akong kanhi klasmeyt sa hayskol nga si Fr. Nanding Lariosa, ang among kanhi magtutudlo Fr. Toto Evidientes ug ang garbo sa Quirino District nga si Fr. Nestor Lizondra.
Human sa Santos nga Misa, nagsugod gidayon ang prosesyon padulong sa memorial park sa Paligue. Kauban ko sa sakyanan si Fr. Nestor nga nagpadayag sa iyang kadismaya sa sitwasyon sa maong sementeryo diin maoy gilubngan usab sa iyang inahan.
Matud pa niya nga morag way tag-iya ang maong memorial park kay hastang tag-asa ang sagbot nga dili makita ang lapida sa namatay. Wala kini kural busa mosulod ang mga baka, kanding ug ubang hayop ug gihimo kini nilang kasilyas.
Dugang pa niya nga adunay higayon nga nagpahagbas pa siya sa sagbot palibot sa lubnganan sa iyang inahan una siya nagsaulog sa misa.
Usa lang ka bahin sa dalan ang nasemento pasulod sa ganghaan nga way porma. Taas pud ang sagbot og may mga hayop sa palibot nga daw pastolan sa baka og lapukon kay ting-ulan na man.
Maayo na lang ang mga lubong nga anaa haduol sa intrada kay makita ang ilang lapida apan ang ubang dapit masaypan gyod nga dalan lamang.
Sa laktod nga pagkasulti, wala giatiman sa tag-iya ang maong memorial park nga dili nako matawag nga park kay di man ganahan ang mga tawo nga mosulod ug moduaw sama sa memorial parks dinhi sa Davao City.
Busa ipaabot namo ni Fr. Nestor isip mga karaang lumulopyo sa maong lungsod ngadto kang Mayor-elect Pedro “Jun” Caminero ang among sentimento sa kahimtang sa naasoy’ng memorial park.
Isip pribadong negosyo nga nahatagan og “business permit” sa munisipyo, adunay katungod ang lokal nga kagamhanan nga sitahon ang mga tag-iya sa tanang establisamiyento nga nagpasagad sa ilang obligayon ug unta presentabli ang memorial park sa Padada.